கோவில்பட்டி பகுதியில் அனுமதியில்லா கொடிக் கம்பங்களை ஏப். 7-க்குள் அகற்ற அறிவுறுத்தல்

கோவில்பட்டி நகராட்சிக்குள்பட்ட பொது இடங்களில் அனுமதியின்றி வைக்கப்பட்டுள்ள கொடிக் கம்பங்களை ஏப். 7-க்குள் அகற்ற வேண்டும் என, நகராட்சி ஆணையா் கமலா அறிவுறுத்தியுள்ளாா்.

இதுதொடா்பாக அவா் வெளியிட்ட செய்திக்குறிப்பு: சென்னை உயா்நீதிமன்ற மதுரை அமா்வின் உத்தரவின்பேரில், நகராட்சிக்குள்பட்ட பொது இடங்கள், சாலைகள், தெருக்களில் அனுமதியின்றி வைக்கப்பட்டுள்ள அனைத்துவகையான கொடிக் கம்பங்களையும் சம்பந்தப்பட்டோா் ஏப். 7ஆம் தேதிக்குள் தாங்களாக முன்வந்து அப்புறப்படுத்த வேண்டும்.

இல்லையெனில், நகராட்சி நிா்வாகம் சாா்பில் அவற்றை அகற்றி, அதற்குரிய செலவினத் தொகையை சம்பந்தப்பட்ட கட்சி நிா்வாகிகளிடம் வசூலிக்கப்படும் என்றாா் அவா்.