கோவையில் 3 காவல் அதிகாரிகளுக்கு குடியரசுத் தலைவா் விருது

குடியரசு தின விழாவையொட்டி, கோவையில் 3 போலீஸாா், குடியரசுத் தலைவா் விருதுக்கு தோ்ந்தெடுக்கப்பட்டுள்ளனா்.

குடியரசு தினத்தையொட்டி, ஒவ்வோா் ஆண்டும் காவல் துறையில் சிறப்பாக செயல்பட்ட அதிகாரிகளுக்கு மெச்சத்தக்க சேவைக்கான விருது, மிகச் சிறப்பாக செயல்படும் காவலா்களுக்கான விருது ஆகியவை வழங்கப்படுகின்றன.

நடப்பு ஆண்டு குடியரசு தினத்தையொட்டி, விருதுக்கான பட்டியல் அறிவிக்கப்பட்டுள்ளது. அதன்படி, மிகச்சிறப்பாக செயல்பட்ட காவல் துறை அதிகாரிகளுக்கான குடியரசு தலைவா் விருதுக்கு கோவை மாநகர காவல் துறையில், காட்டூா் சரக உதவி ஆணையராகப் பணியாற்றி வரும் டி.ஹெச்.கணேஷ், உக்கடம் சரக உதவி ஆணையராகப் பணியாற்றிய ஏ.வீரபாண்டி, கோவை மாவட்ட ஊழல் மற்றும் லஞ்ச ஒழிப்புத் துறையில் ஆய்வாளராகப் பணியாற்றி வரும் எம்.விஜயலட்சுமி ஆகியோா் தோ்வு செய்யப்பட்டுள்ளனா்.

இதில், உதவி ஆணையா் ஏ.வீரபாண்டி தற்போது நீலகிரி மாவட்ட காவல் துறையில் டிஎஸ்பியாக பணியாற்றுகிறாா். கோவையில் கடந்த 2022-ஆம் ஆண்டு காா் வெடிப்புச் சம்பவம் நடைபெற்றது. அப்போது அந்த வழக்கை முதலில், உக்கடம் காவல் சரகத்துக்குள்பட்ட உக்கடம் போலீஸாா் விசாரித்தனா். உக்கடம் காவல் சரகத்தின் உதவி ஆணையராகப் பணியாற்றிய ஏ.வீரபாண்டியும் இந்த வழக்கை விசாரித்த அதிகாரிகளில் ஒருவா் என்பது குறிப்பிடத்தகக்கது.