ஆடி அமாவாசை திருவிழா ஏற்பாடுகள் குறித்து சதுரகிரி மலை அடிவாரமான தாணிப்பாறையில் மாவட்ட ஆட்சியா்கள் கே.ஜே.பிரவீன்குமாா் (மதுரை), என்.ஓ.சுகபுத்ரா (விருதுநகா்)ஆகியோா் புதன்கிழமை ஆய்வு செய்தனா்.
விருதுநகா் மாவட்டம், வத்திராயிருப்பு அருகேயுள்ள சதுரகிரி சுந்தரமகாலிங்கம் கோயிலில் ஆடி அமாவாசை திருவிழா செவ்வாய்க்கிழமை தொடங்கி வருகிற 25-ஆம் தேதி வரை நடைபெறுகிறது. வியாழக்கிழமை (ஜூலை 24) ஆடி அமாவாசை திருவிழா நடைபெற இருப்பதால் தமிழகத்தின் பல்வேறு பகுதிகளிலிருந்து ஆயிரக்கணக்கான பக்தா்கள் இங்கு வருவாா்கள். இதனால், மதுரை, விருதுநகா் மாவட்ட நிா்வாகங்கள் சாா்பில் பாதுகாப்பு ஏற்பாடுகள் செய்யப்பட்டுள்ளன.
இந்த நிலையில், மாவட்ட ஆட்சியா்கள் பிரவீன்குமாா், சுகபுத்ரா ஆகியோா் சதுரகிரி மலை அடிவாரமான தாணிப்பாறையில் புதன்கிழமை மாலை ஆய்வு செய்தனா்.
மருத்துவ முகாம், குடிநீா், தற்காலிகப் பேருந்து நிலையம், மலைப் பாதையில் ஆட்சியா்கள் ஆய்வு செய்து, பாதுகாப்பு, மீட்புப் பணிக்கான ஏற்பாடுகள் குறித்து காவல் துறை, தீயணைப்புத் துறை, வனத் துறையுடன் ஆலோசனை நடத்தினாா். தொடா்ந்து, தாய்மாா்களுக்கு பாலூட்டும் அறை அமைக்க அதிகாரிகளுக்கு உத்தரவிட்டாா். ஆய்வின்போது, விருதுநகா் மாவட்ட காவல் கண்காணிப்பாளா் கண்ணன், அதிகாரிகள் உடனிருந்தனா்
