சாலை விபத்தில் சட்டக் கல்லூரி மாணவா் உயிரிழப்பு

சேலம்: சேலத்தில் திங்கள்கிழமை காலை நிகழ்ந்த சாலை விபத்தில் சட்டக் கல்லூரி மாணவா் உயிரிழந்தாா்.

சேலம் மாவட்டம், எடப்பாடி அருகே கோரணம்பட்டியைச் சோ்ந்தவா் சரண் (21). இவா், சேலத்தில் உள்ள சட்டக் கல்லூரியில் முதலாமாண்டு படித்துவந்தாா். தினமும் ஊரில் இருந்து சேலத்துக்கு இருசக்கர வாகனத்தில் வந்துசெல்வாா்.

அவ்வாறு, திங்கள்கிழமை காலை 8.15 மணியளவில் சேலம் கந்தம்பட்டி ரயில்வே மேம்பாலத்தில் வந்துகொண்டிருந்தாா். அப்போது அடையாளம் தெரியாத வாகனம், அவரது வாகனத்தின் பின்பகுதியில் மோதியதாக கூறப்படுகிறது. அதில் தூக்கிவீசப்பட்ட சரண், தலையில் அடிபட்டு சம்பவ இடத்திலேயே உயிரிழந்தாா்.

தகவலறிந்து வந்த சூரமங்கலம் போலீஸாா், உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனா். மேலும், விபத்தை ஏற்படுத்திய வாகனம் குறித்து போலீஸாா் விசாரணை நடத்தி வருகின்றனா்.