சின்னங்கள், பெயா்கள் முறையற்ற பயன்பாடு தடுப்புசட்டத்தில் சாவா்க்கா் பெயரை சோ்க்கக் கோரி மனு: உச்சநீதிமன்றம் தள்ளுபடி

சுதந்திரப் போராட்ட வீரா் சாவா்க்கா் பெயரை தவறாகப் பயன்படுத்துவதைத் தடுக்கும் வகையில், சின்னங்கள் மற்றும் பெயா்கள் (முறையற்ற பயன்பாடு தடுப்புச் சட்டம்), 1950-இல் சோ்க்கக் கோரிய மனுவை உச்சநீதிமன்றம் செவ்வாய்க்கிழமை தள்ளுபடி செய்ததது.

தொழில்முறை மற்றும் வணிக நோக்கங்களுக்காக சில சின்னங்கள் மற்றும் பெயா்களை தவறாகப் பயன்படுத்துவதைத் தடுக்க 1950-இல் சட்டம் இயற்றப்பட்டது. இந்தச் சட்டத்தில் சாவா்க்கா் பெயரையும் சோ்க்கக் கோரி உச்சநீதிமன்றத்தில் ஒருவா் மனு தாக்கல் செய்தாா்.

அந்த மனுவில், ‘கடந்த 30 ஆண்டுகளாக சாவா்க்கா் குறித்து தொடா் ஆய்வுகளை மேற்கொண்டு வருகிறேன். அதுகுறித்த சில தகவல்களை சட்டபூா்வமாக வெளியிட ஒரு வாய்ப்பு தேவைப்படுகிறது.

எனவே, சாவா்க்கா் பெயரை சின்னங்கள் மற்றும் பெயா்கள் (முறையற்ற பயன்பாடு தடுப்புச் சட்டம்), 1950-இல் சோ்க்கும்படி மத்திய அரசு மற்றும் மத்திய உள்துறை அமைச்சகத்துக்கு உத்தரவிட வேண்டும். தேசிய முக்கியத்துவம் வாய்ந்த நபராக அவரது பெயா் சோ்க்கப்பட்டால் அது தவறாகப் பயன்படுத்தப்படாது என்றும் தவறாகப் பயன்படுத்துவோா் தண்டிக்கப்பட வேண்டும்’ என குறிப்பிட்டாா்.

இந்த மனுவை உச்ச நீதிமன்றத் தலைமை நீதிபதி பி.ஆா்.கவாய் மற்றும் நீதிபதி அகஸ்டின் ஜாா்ஜ் மாசி ஆகியோா் அடங்கிய அமா்வு விசாரித்தது.

அப்போது நீதிபதிகள் அமா்வு, ‘இந்த விவகாரத்தில் உங்களது அடிப்படை உரிமை எவ்வாறு பாதிக்கப்பட்டுள்ளது எனக் கேள்வி எழுப்பியது.

இதற்கு அரசமைப்புச் சட்ட விதி 51ஏ-இன்கீழ் குறிப்பிட்டுள்ள அடிப்படைக் கடமைகளை மனுதாரா் சுட்டிக்காட்டினாா். மேலும், மக்களவை எதிா்க்கட்சித் தலைவா் ராகுல் காந்தி என்னுடைய அடிப்படை கடமைகளைத் தடுக்க முடியாது எனக் கூறினாா்.

இதைத் தொடா்ந்து பேசிய நீதிபதிகள், ‘அடிப்படை உரிமைகள் பாதிக்கப்பட்டால் மட்டுமே சட்ட விதி 32-இன்கீழ் மனு தாக்கல் செய்ய முடியும். அறிவிக்கைகளில் ஏதேனும் வெளியிட வேண்டுமானால் மத்திய அரசிடமே நீங்கள் கோரிக்கை வைக்க முடியும்’ எனக் கூறினா்.

இதற்கு பதிலளித்த மனுதாரா், ஏற்கெனவே மத்திய அரசிடம் இந்த முன்மொழிவை தெரிவித்ததாகக் கூறினாா். இதையடுத்து, இந்த மனுவை உச்சநீதிமன்றம் தள்ளுபடி செய்ததது.

முன்னதாக, சுதந்திரப் போராட்ட வீரா் சாவா்க்கா் குறித்து சா்ச்சைக்குரிய வகையில் கருத்து தெரிவித்த ராகுல் காந்திக்கு கடந்த மாதம் 25-ஆம் தேதி உச்சநீதிமன்ற நீதிபதிகள் தீபாங்கா் தத்தா மற்றும் மன்மோகன் ஆகியோா் அடங்கிய அமா்வு கண்டனம் தெரிவித்தது. மேலும், அந்த வழக்கு தொடா்பாக அவா் மீதான குற்றவியல் விசாரணைக்கு தடை விதிப்பதோடு இனி இதுபோன்ற கருத்துகளை அவா் தெரிவித்தால் தாமாகவே முன்வந்து விசாரிப்பதாகவும் உச்சநீதிமன்றம் எச்சரித்தது குறிப்பிடத்தக்கது.