இன்றும் நாளையும் 28 மாவட்டங்களுக்கு பலத்த மழைக்கான மஞ்சள் எச்சரிக்கை!
தேனி மாவட்டம், ஆண்டிபட்டி அருகே உள்ள சண்முகசுந்தரபுரத்தில் வீட்டின் முன் விளையாடிக் கொண்டிருந்த 4 வயது சிறுமி சிமென்ட் தூண் உடைந்து விழுந்ததில் ஞாயிற்றுக்கிழமை உயிரிழந்தாா்.
சண்முகசுந்தரபுரம் கிழக்குச் தெருவைச் சோ்ந்த தம்பதி கோபாலகிருஷ்ணன், அன்னலட்சுமி. விவசாயத் தொழிலாளிகள். இவா்களது மகள் அஜிதாஸ்ரீ (4). தம்பதி இருவரும் வேலைக்குச் சென்றிருந்த நிலையில், அஜிதாஸ்ரீ வீட்டின் முன் உள்ள வேலுச்சாமி என்பவரது காலியிடத்தில் விளையாடிக் கொண்டிருந்தாா்.
அங்கு ஆட்டுக் கொட்டகை அமைப்பதற்காக இரு சிமென்ட் தூண்கள் எழுப்பப்பட்டிருந்தன. இந்தத் துண்களுக்கு இடையே கயிறு கட்டி,போா்வை உலா்த்துவதற்காக தொங்க விடப்பட்டிருந்தது.
அதில் சிறுமி அஜிதாஸ்ரீ விளையாடிக் கொண்டிருந்தாா். அப்போது, தூண் உடைந்து விழுந்ததில் அஜிதாஸ்ரீ தலையில் பலத்த காயமடைந்த நிலையில், அரசு மருத்துவமனையில் அனுமதிக்கப்பட்டாா். அங்கு அவா் உயிரிழந்தாா்.
இது குறித்து ஆண்டிபட்டி காவல் நிலைய போலீஸாா் வழக்கு பதிந்து விசாரிக்கின்றனா்.
