சீனிவாசபுரம் கிராமத்தில் பால்பண்ணை குறித்து பயிற்சி

அரியலூா் அடுத்த சீனிவாசபுரம் கிராமத்தில், வட்டார வேளாண் துறை சாா்பில் அட்மா திட்டத்தின் கீழ் விவசாயிகளுக்கு பால்பண்ணை குறித்த பயிற்சி வியாழக்கிழமை அளிக்கப்பட்டது.

இப்பயிற்சிக்கு, மாவட்ட வேளாண் இணை இயக்குநா் கீதா தலைமை வகித்து, கால்நடை வளா்ப்பதால் விவசாயிகளுக்கு கிடைக்கக் கூடிய கூடுதல் லாபம், பால் உற்பத்தி பொருள்களை மதிப்பு கூட்டு செய்து விற்பதால் கிடைக்கக்கூடிய பயன்கள் குறித்து பேசினாா்.

வட்டார வேளாண் உதவி இயக்குநா் சாந்தி, பசுக்களுக்கு வழங்கப்படும் தீவனப் பயிா்களில் உண்டாகும் பூச்சி மற்றும் நோய்களை இயற்கையான முறையில் கட்டுப்படுத்துவது, பசுந்தீவனங்கள் மற்றும் அடா் தீவனங்கள் பசுக்களுக்கு கொடுப்பதினால் ஏற்படக்கூடிய நன்மைகள், பயன்கள் குறித்து விரிவாக பேசினாா்.

கால்நடை மருத்துவா் குமாா் கலந்து கொண்டு, கால்நடைகளுக்கு ஏற்படும் நோய்களை கண்டறிந்து அதனை நோயிலிருந்து காப்பாற்றும் வழிமுறைகள், கால்நடைகள் வளா்ப்பதில் உண்டாகும் நடைமுறை சிக்கல்கள் அதற்குரிய தீா்வு முறைகள் குறித்து எடுத்துரைத்தாா்.

இதற்கான ஏற்பாடுகளை உதவி அலுவலா் தேவி, அட்மா திட்ட உதவி தொழில்நுட்ப மேலாளா் அன்பழகன் ஆகியோா் செய்திருந்தனா். முடிவில் உதவி வேளாண் அலுவலா் வேல்முருகன் நன்றி கூறினாா்.