சீா்காழி: ‘உங்களுடன் ஸ்டாலின்’ திட்ட முகாம்களில் 15,000 போ் மகளிா் உரிமைத் தொகை கோரி மனு

சீா்காழி நகராட்சி பகுதியில் செவ்வாய்க்கிழமை நடைபெற்ற ‘உங்களுடன் ஸ்டாலின்‘ திட்ட முகாமில் ஏராளமான பெண்கள் மகளிா் உரிமைத் தொகை கோரி விண்ணப்பித்தனா். இத்துடன் சீா்காழி கோட்டத்தில் இதுவரை 15 ஆயிரத்திற்கும் மேற்பட்டோா் மகளிா் உரிமைத் தொகை கோரி மனு அளித்துள்ளனா்.

சீா்காழி நகராட்சி 13, 16 ஆகிய வாா்டு பகுதி மக்களுக்கான உங்களுடன் ஸ்டாலின் திட்டம் முகாம் நகராட்சி ஆணையா் மஞ்சுளா தலைமையில் நடைபெற்றது. நகா்மன்ற துணைத் தலைவா் சுப்பராயன், நகரமைப்பு ஆய்வாளா் மரகதம், நகா்மன்ற உறுப்பினா்கள் முபாரக், பாஸ்கரன், ராமு ஆகியோா் முன்னிலை வகித்தனா்.

சீா்காழி சட்டப்பேரவை உறுப்பினா் எம். பன்னீா்செல்வம் முகாமை தொடங்கி வைத்து, பாா்வையிட்டாா். இதில் 13 துறைகளை சோ்ந்த 43 சேவைகள் தொடா்பாக பொதுமக்களிடம் மனுக்களை பெற்றப்பட்டன.

மாவட்ட வருவாய் அலுவலா் உமா மகேஸ்வரி, சீா்காழி வட்டாட்சியா் அருள்ஜோதி, மகளிா் உரிமைத் தொகை துணை வட்டாட்சியா் பாபு ஆகியோா் பொதுமக்கள் கோரிக்கைகள் குறித்து அந்தந்த துறை சாா்ந்த முகாம் ஸ்டால்களுக்கு அனுப்பி வைத்தனா்.

அந்தவகையில், மின் இணைப்பு பெயா் மாற்றம் கோரி மனு அளித்தவருக்கு பெயா் மாற்ற ஆணையை மாவட்ட வருவாய் அலுவலா் உமா மகேஸ்வரி வழங்கினாா்.

சீா்காழி, தரங்கம்பாடியை உள்ளடக்கிய கோட்ட பகுதிகளில் விடுபட்டவா்களுக்கான மகளிா் உரிமைத் தொகை கோரி இதுவரை 15 ஆயிரத்துக்கு மேற்பட்ட பெண்கள் விண்ணப்பம் அளித்துள்ளனா் என துணை வட்டாட்சியா் தெரிவித்தாா்.