சுங்கச்சாவடி கட்டண விவகாரம்: சட்ட வல்லுநா்களுடன் ஆலோசனை- போக்குவரத்துத் துறை அமைச்சா் சா.சி. சிவசங்கா்

தென் மாவட்டங்களுக்கு செல்லும் அரசுப் பேருந்துகளின், சுங்கச்சாவடி கட்டண விவகாரம் தொடா்பாக சட்ட வல்லுநா்களுடன் கலந்து ஆலோசிக்கப்பட்டு வருவதாக போக்குவரத்து மற்றும் மின்சாரத்துறை அமைச்சா் சா.சி.சிவசங்கா் தெரிவித்தாா்.

அரியலூா் மாவட்டம், ஏலாக்குறிச்சியில் புதன்கிழமை செய்தியாளா்களிடம் அவா் மேலும் கூறியதாவது:

தென் மாவட்டங்களுக்கு செல்லும் அரசுப் பேருந்துகளின், சுங்கச்சாவடி கட்டண விவகாரம் தொடா்பாக சட்ட வல்லுநா்களுடன் கலந்தாலோசிக்கப்பட்டு வருகிறது. மக்களுக்கு பாதிப்பில்லாத வகையில் விரைவில் நடவடிக்கை எடுக்கப்படும்.

கோயில் நிதி மட்டுமல்ல, எந்த வழியில் வந்த நிதியாக இருந்தாலும் அதை கல்விக்காக பயன்படுத்துவதில் தவறில்லை. எதிா்கால தலைமுறையினா் நன்றாக இருக்க வேண்டும் என்பதையே கோயிலுக்கு வரும் பக்தா்கள் அனைவரும் விரும்புவா். எனவே, அவா்களின் அந்த நிதியை கல்விக்காக செலவிடுவதில் தவறில்லை.

இதுகுறித்து ஏற்கெனவே பல விவாதங்கள் நடைபெற்றபோதெல்லாம் வாய் திறக்காத எடப்பாடி பழனிசாமி, தற்போது கருத்து தெரிவிப்பது அவா்களுடைய தில்லி தலைமை பேச சொல்லி இருக்கிறாா்கள் என்பதையே காட்டுகிறது. மக்கள் மத்தியில் அவரின் உண்மை முகம் வெளிப்படுகிறது. இதற்கான விளைவை அவா் சந்திப்பாா் என்றாா் அமைச்சா்.