செனையக்குடியில் சிவலிங்கம் கண்டெடுப்பு: அலங்கரித்து மக்கள் வழிபாடு

புதுக்கோட்டை மாவட்டம், கீரனூா் அருகே செனையக்குடியில் உடைந்த நிலையில் சிவலிங்கம் வெள்ளிக்கிழமை கண்டெடுக்கப்பட்டது. இதைத் தொடா்ந்து அதை அப்பகுதி பொதுமக்கள் அலங்கரித்து வழிபட்டனா்.

செனையக்குடியில் சோழா் கால சிற்பங்கள் மற்றும் கற்றளி கட்டுமானம் அண்மையில் தொல்லியல் ஆா்வலா்களால் கண்டுபிடிக்கப்பட்டது.

சைவம், வைணவம், சமணம் ஆகிய பிரிவுகளின் சிற்பங்கள் கிடைத்த இந்தப் பகுதியில், புதுக்கோட்டை தொல்லியல் ஆய்வுக் கழகத்தின் நிறுவனா் ஆ. மணிகண்டன், தலைவா் மேலப்பனையூா் கரு. ராஜேந்திரன் உள்ளிட்டோா் வெள்ளிக்கிழமை தொடராய்வில் ஈடுபட்டனா். அப்போது, காய்ந்த சருகுகளுக்கு உள்ளே உடைந்த நிலையில் சிவலிங்கம் காணப்பட்டது. உடைந்த பகுதியை எடுத்து வைத்துப் பொருத்தினா்.

இதுகுறித்து ஆ. மணிகண்டன் கூறியது: இந்தப் பகுதியில் இருந்த சிவன் கோயில் அருண்மொழீஸ்வரம் என்று ராஜராஜனின் பெயரால் அழைக்கப்பட்டுள்ளது என்பது கல்வெட்டுச் சான்றுகள் மூலம் அறிந்து கொள்ள முடிகிறது. எனவே, ராஜராஜன் பெயரிலிருந்த சிவன் கோயில்தான் தற்போது அடையாளம் காணப்பட்டுள்ள லிங்கத்துடன் கூடிய சிவன் கோயில் என்பதை உறுதி செய்ய முடிகிறது.

இந்தக் கோயில் கட்டுமானம், சிற்பங்கள் அடிப்படையில் பாா்க்கும்போது 12-ஆம் நூற்றாண்டைச் சோ்ந்ததாக இருக்கலாம் என்றாா் மணிகண்டன்.

இந்தப் பகுதியில் சிவலிங்கம் கிடைத்ததைத் தொடா்ந்து, ‘அன்பு தானே எல்லாம் சேது அறக்கட்டளை’ குழுவினா், செனையக்குடி ஊா்த் தலைவா் மாரியப்பன், தொல்லியல் ஆா்வலா் சிவனடியாா் மாரிமுத்து உள்ளிட்ட ஊா்க்காரா்கள் சிவலிங்கத்தை அலங்கரித்து மாலையிட்டு வழிபாடு நடத்தினா். தொடா்ந்து இந்தப் பகுதியில் உழவாரப் பணி நடைபெறவுள்ளதாகவும் அவா்கள் தெரிவித்தனா்.