இந்திய தொழில்முனைவோா் மேம்பாட்டு நிறுவனம் சாா்பில் ‘ஹேண்ட் மேட் இன் இந்தியா’ திட்டத்தின் கீழ் நெசவாளா்கள் மற்றும் வியாபாரிகளுடனான கலந்துரையாடல் நிகழ்ச்சி சென்னிமலையில் வெள்ளிக்கிழமை நடைபெற்றது.
இதில், ஹேண்ட் மேட் இன் இந்தியா திட்டத்தின் முதன்மைப் பயிற்சியாளா் த.நவீன்குமாா் கலந்து கொண்டு திட்டத்தின் நோக்கம் மற்றும் பயிற்சிகள் குறித்து எடுத்துரைத்தாா்.
அப்போது, கைத்தறி துறையின் முக்கிய சவால்கள் குறித்து விவாதிக்கப்பட்டது. குறிப்பாக கைத்தறி தயாரிப்புகள் விற்பனைக்கு சமகால சந்தையில் ஏற்படும் சிரமங்கள் மற்றும் சிக்கல்கள் குறித்து எடுத்துரைக்கப்பட்டது.
இந்த நிகழ்ச்சியில் கலந்து கொண்ட நெசவாளா்களும், வியாபாரிகளும் தங்களது அனுபவங்களை பகிா்ந்து கொண்டு, துறையின் முன்னேற்றத்துக்குத் தேவையான பயிற்சிகள் மற்றும் வழிகாட்டுதல் உதவிகளை வழங்க வலியுறுத்தினா்.
