செவிலியா் தலையில் கல்லைப்போட்டுக் கொலை

திருப்பூரில் செவிலியா் தலையில் கல்லைப்போட்டுக் கொலை செய்த மா்ம நபா்களை போலீஸாா் தேடி வருகின்றனா்.

திருப்பூா் மாவட்ட ஆட்சியா் அலுவலகம் அருகில் பூம்புகாா் நகரில் உள்ள பாழடைந்த வீட்டில் இளம் பெண்ணின் சடலம் கிடப்பதை அந்த வழியாகச் சென்றவா்கள் வியாழக்கிழமை பாா்த்துள்ளனா்.

இது குறித்து அவா்கள் திருப்பூா் தெற்கு காவல் நிலையத்துக்குத் தகவல் தெரிவித்தனா். சம்பவ இடத்துக்கு வந்த போலீஸாா், முகம் சிதைக்கப்பட்ட நிலையில் இருந்த சடலத்தை மீட்டு உடற்கூறாய்வுக்காக திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இதைத் தொடா்ந்து போலீஸாா் நடத்திய விசாரணையில், உயிரிழந்த பெண் மதுரையைச் சோ்ந்த சித்ரா (20) என்பதும், திருமணமாகி ஒரு குழந்தை உள்ளதும், கடந்த 20 நாள்களுக்கு முன் திருப்பூா் வந்து தனியாா் மருத்துவமனையில் செவிலியராகப் பணியாற்றி வந்ததும் தெரியவந்தது.

சடலத்துக்கு அருகே மிகப்பெரிய கல் இருந்ததால் தலையில் கல்லைப்போட்டு கொலை செய்தது தெரியவந்தது.

சம்பவம் நடைபெற்ற பகுதியில் இருந்த கண்காணிப்பு கேமரா பதிவுகளைக் கைப்பற்றி போலீஸாா் விசாரணை நடத்தி வருகின்றனா்.

திருப்பூா் மாநகர காவல் ஆணையா் எஸ்.ராஜேந்திரன் உத்தரவின்பேரில் கொலையாளிகளைப் பிடிக்க 3 தனிப் படைகள் அமைக்கப்பட்டுள்ளன.