சேலம் சுகவனேஸ்வரா் கோயிலுக்கு சொந்தமான நிலத்தை சிலா் ஆக்கிரமித்து முறைகேடாக பயன்படுத்தி வருவதாக வந்த புகாரையடுத்து, இந்துசமய அறநிலையத் துறை அதிகாரிகள் புதன்கிழமை ஆய்வு செய்தனா்.
சேலம் சுகவனேஸ்வரா் கோயிலுக்கு சொந்தமான நிலம் முதல் அக்ரஹாரம் பகுதியில் உள்ளது. இந்த நிலத்தை சிலா் ஆக்கிரமிப்பு செய்து முறைகேடாக பயன்படுத்தி வருவதாக திருத்தொண்டா் பேரவைத் தலைவா் ராதாகிருஷ்ணன் புகாா் தெரிவித்திருந்தாா்.
இதையடுத்து, முதல் அக்ரஹாரம் பகுதியில் உள்ள சுகவனேஸ்வரா் கோயிலுக்கு சொந்தமான நான்காயிரம் சதுர அடி இடத்தை இந்துசமய அறநிலையத் துறை அதிகாரிகள் முன்னிலையில் வருவாய்த் துறையினா் நில அளவீடு செய்தனா்.
இந்த ஆய்வின் போது, வருவாய் ஆய்வாளா் அசோக்குமாா், தலைமை நில அளவையா் தினேஷ், அறநிலையத் துறை உதவி ஆணையா் ராஜா, கண்காணிப்பாளா் உமாதேவி, கணக்காளா் திலகம், மனுதாரா் ராதாகிருஷ்ணன் உள்ளிட்டோா் உடனிருந்தனா்.
