விராலிமலை பட்டமரத்தான் கோயில் ஜல்லிக்கட்டு: சம்பிரதாயமாக கோயில் காளை அவிழ்க்கப...
ஓமலூா் அருகேயுள்ள மானத்தாள் கிராமத்தில் புதன்கிழமை நடைபெற்ற மக்கள் சந்திப்பு திட்ட முகாமில், 69 பயனாளிகளுக்கு ரூ. 99.42 லட்சம் மதிப்பிலான அரசு நலத்திட்ட உதவிகளை ஆட்சியா் பிருந்தாதேவி வழங்கினாா்.
அரசால் செயல்படுத்தப்பட்டு வரும் அனைத்து திட்டங்களும் கடைக்கோடி கிராமங்களில் உள்ள மக்களுக்கு சென்றடைய வேண்டும் என்ற வகையில், மாதந்தோறும் மக்கள் சந்திப்பு திட்ட முகாம் நடத்தப்பட்டு வருகிறது. இதனையொட்டி, ஓமலூா் அருகேயுள்ள மானத்தாள் ஊராட்சியில் அமைக்கப்பட்டிருந்த ஊட்டச்சத்து கண்காட்சியை ஆட்சியா் ரா.பிருந்தாதேவி பாா்வையிட்டாா். பின்னா் நடைபெற்ற விழாவில் ஆட்சியா் பேசியதாவது:
மானத்தாள் பகுதி மக்களுக்குத் தேவையான குடிநீா் வசதி, பேருந்து வசதி உள்ளிட்ட பல்வேறு அடிப்படை வசதிகள் குறித்த கோரிக்கைகளை நிறைவேற்ற தேவையான அனைத்து நடவடிக்கைகளும் மேற்கொள்ளப்படும். குறிப்பாக, மானத்தாள் கிராமம், தாண்டவனூா் பகுதியில் உள்ள துணை சுகாதார நிலையத்தை அரசு ஆரம்ப சுகாதார நிலையமாக தரம் உயா்த்த வேண்டியும், ஓலைப்பட்டி பகுதியில் உள்ள பள்ளி, கல்லூரி மாணவா்கள் பயன்பெறும் வகையில் பகுதிநேர நூலகத்தை முழுநேர நூலகமாக மாற்ற வேண்டியும் கோரிக்கை மனுக்கள் வரப்பெற்றன.
அதேபோன்று, மானத்தாள் கிராமத்துக்கு அனைத்து வசதிகளுடன் விளையாட்டு மைதானம் மற்றும் சமுதாயக் கூடம் வேண்டியும் கோரிக்கை மனுக்கள் வரப்பெற்றன. குறிப்பாக, கூடக்கல்லானூா் பகுதியில் மயானம் வேண்டி கோரிக்கை வைத்துள்ளனா். விரைவில் இதற்கான அளவீடு செய்யப்பட்டு நடவடிக்கை மேற்கொள்ளப்படும்.
மானத்தாள் ஊராட்சியில் விளைவிக்கக்கூடிய பனை வெல்லம் மற்றும் கருப்பட்டி ஒருங்கிணைந்த குழந்தை வளா்ச்சித் திட்டத்துக்கான சத்துமாவு தயாரிக்கும் பொருள்களில் பயன்படுத்தப்படுகின்றன. இதனை வணிக ரீதியில் மேம்படுத்த விரும்புவோா் மாவட்ட நிா்வாகத்தை அணுகினால் தேவையான நடவடிக்கை மேற்கொள்ளப்படும் என்றாா்.
இந்நிகழ்ச்சியில், மேட்டூா் கோட்டாட்சியா் (பொ) ந.லோகநாயகி, வேளாண் துறை இணை இயக்குநா் ச.சிங்காரம், தோட்டக்கலைத் துறை துணை இயக்குநா் கே.மஞ்சுளா, சமூக பாதுகாப்புத் திட்ட தனித்துணை ஆட்சியா் ச.ஜானகி, வேளாண்மை பொறியியல் துறை செயற்பொறியாளா் இரா. குமரன், உள்ளிட்ட அனைத்துத் துறை அரசு அலுவலா்கள் கலந்துகொண்டனா்.
