விழுப்புரம் ஆட்சியரகத்தில் மாற்றுத்திறனாளிகள் முற்றுகைப் போராட்டம்
பல்வேறு கோரிக்கைகளை வலியுறுத்தி, வருகிற 6-ஆம் தேதி அவசர ஊா்தி தொழிலாளா்கள் (சிஓஐடியூ) சங்கத்தினா் ஆா்ப்பாட்டம் நடத்தவுள்ளனா்.
சிவகங்கை அருகேயுள்ள வாணியங்குடியில் அவசர ஊா்தி தொழிலாளா்கள் சங்கத்தின் ஆலோசனைக் கூட்டம் சனிக்கிழமை நடைபெற்றது. இந்தக் கூட்டத்துக்கு அச்சங்க மாவட்டத் தலைவா் மணிகண்டன் தலைமை வகித்தாா். மாவட்டச் செயலா் சங்கா் முன்னிலை வகித்தாா். இதில் சிறப்பு விருந்தினராகக் கலந்து கொண்ட மாநில பொதுச் செயலா் இரா.ராஜேந்திரன் பேசியதாவது:
108 அவசர ஊா்தி சேவை திட்டத்தை எம்ரி-ஜிஎச்எஸ் என்ற தனியாா் நிறுவனம் ஒப்பந்த முறையில் தமிழகத்தில் நடத்தி வருகிறது. இந்தத் திட்டத்தில் தமிழக முழுவதும் 1300-க்கும் மேற்பட்ட 108 அவசர ஊா்திகள் இயக்கப்படுகின்றன. இதில் 7ஆயிரத்துக்கும் மேற்பட்ட ஆண், பெண் தொழிலாளா்கள் 24 மணி நேரமும் பணிபுரிகின்றனா்.
சிவகங்கை மாவட்டத்தில் 112 அவசர ஊா்திகள், ஒரு இரு சக்கர வாகன அவசர ஊா்தியும் இயங்குகின்றன. இவற்றில் 176 -க்கும் மேற்பட்ட தொழிலாளா்கள் வேலைப் பாா்த்து வருகின்றனா்.
இந்த நிலையில், புதுப்புது செயலிகளைக் கொண்டு வந்து, இந்தச் சேவையைப் பொதுமக்களுக்கு உரிய நேரத்திலும், உரிய வகையிலும் கிடைக்காத சூழ்நிலையை உருவாகியுள்ளன. நிா்வாகத்தினா் இத்தகைய தவறை மறைப்பதற்காக தொழிலாளா்கள் மீது பொய்யான குற்றச்சாட்டை சுமத்தி வருகின்றனா் என்றாா் அவா்.
தீா்மானங்கள்: சிவகங்கை மாவட்டத்தில் இயக்கப்படும் 108 அவசர ஊா்திகள் அடிக்கடி பழுது ஏற்பட்டு நிறுத்தி வைக்கப்படுகின்றன. ஆள்கள் பற்றாக்குறை காரணமாக, பல அவசர ஊா்திகள் இயக்கப்படாமல் உள்ளன. இந்தச் சேவை திட்டத்தில் பணிபுரியும் தொழிலாளா்களுக்கு நிா்வாகத்தினா் அடிப்படை வசதிகள் செய்து தரவில்லை. தரமற்ற ஜிபிஎஸ் கருவிகளை அவசர ஊா்திகளில் பொருத்தி அதன் அடிப்படையில் அவசர அழைப்புகள் வழங்கப்படுவதால் பொதுமக்கள் பாதிக்கப்படுவதைத் தடுக்க வேண்டும். இந்தக் கோரிக்கைகளை வலியுறுத்தி, வருகிற 6-ஆம் தேதி ஆா்ப்பாட்டம் நடத்துவது என்பன உள்பட பல்வேறு தீா்மானங்கள் நிறைவேற்றப்பட்டன.
