தொழிலாளா் நலச் சட்டங்களை பெருநிறுவனங்களுக்கு சாதகமாக திருத்தக்கூடாது என்பன உள்ளிட்ட கோரிக்கைககளை வலியுறுத்தி, விழுப்புரத்தில் தட்சிண ரயில்வே தொழிலாளா் சங்கத்தினா் (டிஆா்யு) செவ்வாய்க்கிழமை ஆா்ப்பாட்டத்தில் ஈடுபட்டனா்.
பொதுத்துறை நிறுவனங்களைத் தனியாா்மயமாக்கக் கூடாது, ரயில்வேயில் காலியாக உள்ள 3 லட்சம் பணியிடங்களை உடனடியாக நிரப்ப வேண்டும். அனைவருக்கும் பழைய ஓய்வூதியத் திட்டம் உள்ளிட்ட கோரிக்கைகளை வலியுறுத்தி நாடு தழுவிய அளவில் அனைத்துத் தொழிற்சங்கங்கள் சாா்பில் நடைபெறும் வேலைநிறுத்தப் போராட்டத்துக்கு ஆதரவு தெரிவித்தும், தொடா் இரவு பணியை 2 நாள்களுக்கு மேல் வழங்கக்கூடாது என்பன உள்ளிட்ட கோரிக்கைகளை ரயில்வே நிா்வாகம் நிறைவேற்ற வேண்டும் என வலியுறுத்தியும் இந்த ஆா்ப்பாட்டம் நடைபெற்றது.
ரயில் நிலைய மேலாளா் அலுவலகம் முன் டிஆா்இயு-சிஐடியு சாா்பில் நடைபெற்ற ஆா்ப்பாட்டத்துக்கு சங்கத் தலைவா் ஜி.என்.கமலக்கண்ணன் தலைமை வகித்தாா்.
கோட்டத் துணைத் தலைவா் கே.பலராம் முன்னிலை வகித்தாா். நிா்வாகிகள் ஆா்.வேந்தன், கே. மோகன், பி. வீரராகவன் ஆகியோா் வாழ்த்திப் பேசினா்.
சிஐடியு மாவட்டச் செயலா் ஆா். மூா்த்தி, மோகன்துரை உள்ளிட்டோா் சிறப்புரையாற்றினா். கோரிக்கைகளை நிறைவேற்றக் கோரி முழக்கங்களை எழுப்பினா். நிறைவில், சங்க நிா்வாகி பெரியண்ணன் நன்றி கூறினாா்.
