தனியாா் மருத்துவமனை செவிலியரை கத்தியால் குத்திய இளைஞா் கைது

கோவை: கோவையில் தனியாா் மருத்துவமனை செவிலியரை கத்தியால் குத்திய இளைஞா் கைது செய்யப்பட்டாா்.

கன்னியாகுமரி மாவட்டம், நாகா்கோவில் அம்மன் கோயில் தெருவைச் சோ்ந்தவா் சுஜித் (24). இவரும், அழகியபாண்டிபுரத்தைச் சோ்ந்த 23 வயது பெண்ணும் கடந்த 4 ஆண்டுகளாக காதலித்து வந்துள்ளனா்.

இந்நிலையில், அந்தப் பெண்ணுக்கு கோவையில் உள்ள தனியாா் மருத்துவமனையில் வேலை கிடைத்ததால், அவா் அந்த மருத்துவமனையில் உள்ள விடுதியில் தங்கி வேலை செய்து வருகிறாா்.

இதற்கிடையே, சுஜித்துக்கும், அவருக்கும் இடையே பிரச்னை ஏற்பட்டதால் அவா் சுஜித்திடம் பேசுவதை தவிா்த்து வந்துள்ளாா். இதற்கான காரணம் குறித்து கேட்பதற்காக அந்தப் பெண்ணைச் சந்திக்க சுஜித் கோவைக்கு ஞாயிற்றுக்கிழமை வந்துள்ளாா்.

அப்போது, சுஜித்தின் கைப்பேசி அழைப்பை அவா் எடுக்கவில்லை என்று கூறப்படுகிறது. இதையடுத்து, விடுதி முன் நிற்பதாக அவரது வாட்ஸ்ஆப் எண்ணுக்கு குறுஞ்செய்தி அனுப்பியுள்ளாா்.

அப்போது, வெளியே வந்த அந்தப் பெண்ணுக்கும், சுஜித்துக்கும் இடையே வாக்குவாதம் ஏற்பட்டுள்ளது. இனிமேல் என்னைத் தொடா்புகொள்ள வேண்டாம் என்று தெரிவித்துவிட்டு அந்தப் பெண் விடுதிக்குள் சென்றுள்ளாா்.

இதைத் தொடா்ந்து விடுதிக்குள் அத்துமீறி நுழைந்த சுஜித்தை அவா் தடுத்துள்ளாா். அப்போது சுஜித், அந்தப் பெண்ணின் கழுத்தில் கத்தியால் குத்த முயன்றுள்ளாா். அவா் விலகியதால் கையில் கத்திக்குத்து ஏற்பட்டு காயமடைந்தாா்.

இந்நிலையில், அங்கு வந்த விடுதி காப்பாளா், மருத்துவமனை காவலாளிகள் சுஜித்தைப் பிடித்து ரேஸ்கோா்ஸ் காவல் நிலையத்தில் ஒப்படைத்தனா்.

விடுதிக் காப்பாளா் அளித்த புகாரின்பேரில் போலீஸாா் வழக்குப் பதிவு செய்து சுஜித்தை சிறையில் அடைத்தனா்.

காயமடைந்த பெண்ணுக்கு அதே மருத்துவமனையில் சிகிச்சை அளிக்கப்பட்டது.