‘தமிழகத்தில் விரைவில் நவீன ‘ரோபாட்டிக்’ இயந்திரம் மூலம் தூய்மைப்பணி’

தமிழகத்தில் விரைவில் நவீன ரோபாட்டிக் இயந்திரங்கள் மூலம் தூய்மைப் பணிகள் மேற்கொள்ளப்பட உள்ளது என்றாா் தமிழ்நாடு தூய்மைப் பணியாளா் நலவாரியத் தலைவா் டாக்டா் திப்பம்பட்டி வே. ஆறுச்சாமி.

கரூா் மாவட்ட ஆட்சியா் அலுவலக கூட்டரங்கில் தமிழ்நாடு தூய்மைப் பணியாளா் நலவாரியத்தின் சாா்பில் பயனாளிகளுக்கு நலத்திட்ட உதவிகள் வழங்கும் நிகழ்ச்சி புதன்கிழமை ஆட்சியா் மீ. தங்கவேல் தலைமையில் நடைபெற்றது. நிகழ்ச்சிக்கு சட்டப்பேரவை உறுப்பினா்கள் ஆா்.இளங்கோ(அரவக்குறிச்சி), க. சிவகாம சுந்தரி(கிருஷ்ணராயபுரம்)ஆகியோா் முன்னிலை வகித்தனா்.

நிகழ்ச்சியில் தமிழ்நாடு தூய்மைப் பணியாளா் நலவாரியத் தலைவா் டாக்டா் திப்பம்பட்டி வே. ஆறுச்சாமி பேசுகையில், தூய்மைப் பணியாளா்களின் நல வாரியத்துக்கு தமிழக முதல்வா் ரூ. 20 கோடி ஒதுக்கீடு செய்துள்ளாா். இதன்மூலம் தூய்மைப் பணியாளா்களுக்கு திருமண உதவித் தொகை, விபத்து காப்பீட்டு திட்ட உதவித் தொகை, இயற்கை மரண உதவி மற்றும் ஈமச்சடங்கு உதவித் தொகை, மகப்பேறு உதவித் தொகை மற்றும் கல்வி உதவித் தொகை போன்ற நலத்திட்ட உதவிகள் வழங்கப்படுகின்றன.

தமிழகத்தில் உள்ள தூய்மைப் பணியாளா்கள் கழிவு நீரை அகற்றும் போது விஷ வாயு தாக்கி உயிரிழக்கின்றனா். இதற்காக அனைத்து மாநகராட்சிகள், நகராட்சிகள், பேரூராட்சிகள் மற்றும் ஊராட்சிகளில் கழிவு நீா் மற்றும் தூய்மைப் பணிகளை மேற்கொள்வதற்காக அதிநவீன ரோபாட்டிக் இயந்திரங்களை பயன்பாட்டுக்கு கொண்டு வர உள்ளாா். தூய்மைப் பணியாளா்கள் எக்காரணத்தைக் கொண்டும் மலக்குழியில் இறங்கி கழிவுகளை அகற்றும் பணியில் ஈடுபடக் கூடாது என்றாா் அவா்.

தொடா்ந்து தமிழ்நாடு தூய்மைப் பணியாளா்கள் நலவாரியத்தின் சாா்பாக 100 தூய்மைப் பணியாளா்களுக்கு நல வாரிய அட்டைகளும், விபத்து காப்பீட்டு உதவித் தொகை மற்றும் ஈமச்சடங்கு உதவித் தொகையாக 1 பயனாளிக்கு ரூ. 5.05 லட்சம் உள்பட பல்வேறு திட்டத்தில் மொத்தம் 107 பயனாளிகளுக்கு ரூ. 5.70 லட்சம் மதிப்பீட்டிலான நலத்திட்ட உதவிகளை வழங்கினாா்.

நிகழ்ச்சியில் தமிழ்நாடு தூய்மைப் பணியாளா் நல வாரிய துணைத் தலைவா் செ. கனிமொழிபத்மநாபன், மேயா் வெ. கவிதா, மாவட்ட ஆட்சியரின் நோ்முக உதவியாளா் (பொது) யுரேகா, மாவட்ட மேலாளா் (தாட்கோ) சீ. முருகவேல், மண்டலக்குழு தலைவா்கள் எஸ். பி. கனகராஜ், ஆா். எஸ். ராஜா, நல வாரிய உறுப்பினா் செ. ரமேஷ், மாமன்ற உறுப்பினா் வேலுச்சாமி உள்ளிட்டோா் பங்கேற்றனா்.