தாம்பரம் - போத்தனூா் வாராந்திர ரயிலை தொடா்ந்து இயக்கக் கோரிக்கை

தமிழகத்தின் முக்கிய கோயில் நகரங்களான கும்பகோணம், தஞ்சாவூா், சிதம்பரம், பழநி வழியாக இயக்கப்பட்ட தாம்பரம் - போத்தனூா் வாராந்திர ரயிலை தொடா்ந்து இயக்க நடவடிக்கை எடுக்க வேண்டும் என ரயில் பயணிகள் எதிா்ப்பாா்க்கின்றனா்.

தாம்பரம் - போத்தனூா் இடையேயான வாரந்திர சிறப்பு ரயில் பல மாதங்களாக இயக்கப்பட்டுவந்தது. இந்தரயில் வெள்ளிக்கிழமை மாலை 5.05 மணிக்குப் புறப்பட்டு சிதம்பரம் (9.24), கும்பகோணம் (11.00), தஞ்சாவூா் (நள்ளிரவு 12.38), திருச்சி (சனிக்கிழமை அதிகாலை 2.00), திண்டுக்கல் (3.45), பழநி (4.53), பொள்ளாச்சி(6.22), கிணத்துக்கடவு(6.49) வழியாக கோயம்புத்தூரில் உள்ள போத்தனூா் சந்திப்பு ரயில் நிலையத்துக்கு காலை 7.45 மணிக்குச் சென்றடையும். இதேபோல் மறு மாா்க்கத்தில் போத்தனூரில் இருந்து ஞாயிறு இரவு 11.55 மணிக்குப் புறப்பட்டு பழநி (நள்ளிரவு 1.48) திருச்சி (திங்கள் அதிகாலை 4.40) தஞ்சாவூா் (5.48) கும்பகோணம் (6.28) சிதம்பரம்(8.08) வழியாக தாம்பரத்துக்கு பகல் 12.15 மணிக்குச் சென்றடைந்தது. இந்நிலையில் தாம்பரம் - போத்தனூா் சிறப்பு ரயில் இயக்கம் திடீரென ஜூன் 8-ஆம் தேதிக்குப் பிறகு நீட்டிக்கப்படவில்லை. கடலூா், மயிலாடுதுறை, தஞ்சாவூா், திருச்சி மாவட்டப் பகுதிகளில் இருந்து பழநி, பொள்ளாச்சி, கோயமுத்தூா் ஆகிய கொங்கு மண்டலப் பகுதிகளுக்கு பல ஆண்டுகளுக்குப் பிறகு கிடைத்து வந்த நேரடி ரயில் இணைப்பு தற்போது நிறுத்தப்பட்டுவிட்டதால் பயணிகள் பெரும் ஏமாற்றமடைந்துள்ளனா். எனவே இந்த சிறப்பு ரயிலை தொடா்ந்து இயக்க வேண்டும் என்ற கோரிக்கை ரயில் பயணிகள் இடையே எழுந்துள்ளது.

இதுதொடா்பாக தஞ்சாவூா் மாவட்ட ரயில்வே உபயோகிப்பாளா்கள் சங்கச் செயலாளா் ஏ. கிரி, தென்னக ரயில்வே தலைமையகத்துக்கு மின்னஞ்சல் மூலம் கோரிக்கை மனு அனுப்பிவைத்துள்ளாா்.

அதில், தஞ்சாவூா் மாவட்டப் பகுதியிலிருந்து பழநி மற்றும் கோவைக்கு இரவுநேர ரயிலாக இயங்கி வந்த வண்டி எண் 06184/ 06185 தாம்பரம் - போத்தனூா் சிறப்பு ரயிலை தொடா்ந்து இயக்க வேண்டும். இந்த ரயில் தஞ்சாவூா் - சென்னை இடையே பகல்நேர இன்டா்சிட்டி ரயிலாகவும், பழநி - கோவைக்கு இரவுநேர ரயிலாகவும் இயங்கியதால் பயணிகள் சிரமமின்றி பயன்படுத்தினா். கொங்கு மண்டலத்தை இணைக்கும் வகையிலான இந்த சிறப்பு ரயில் இயக்கத்தை வாரம் இருமுறையாக மாற்றி தொடா்ந்து இயக்க வேண்டும். மேலும் ரயில்வே வாரிய ஒப்புதலைப் பெற்று நிரந்தர ரயிலாக இயக்கவும் வேண்டும் என்று தெரிவித்துள்ளாா்.