‘தாயுமானவா்’ திட்டத்தின் கீழ், பெரம்பலூா் மாவட்டத்தில் 15,818 போ் பயனடைந்து வருகின்றனா் என மாவட்ட ஆட்சியா் ந. மிருணாளினி தெரிவித்துள்ளாா்.
பெரம்பலூா் மாவட்டம், வேப்பந்தட்டை வட்டம், வாலிகண்டபுரம் ஊராட்சியில் தாயுமானவா் திட்டத்தின் கீழ் பயனாளிகளுக்கு குடிமைப் பொருள்கள் வழங்கும் பணியை புதன்கிழமை பாா்வையிட்டு ஆய்வு மேற்கொண்ட மாவட்ட ஆட்சியா் மேலும் கூறியது: எழுபது வயதுக்கு மேற்பட்ட முதியவா்கள் மற்றும் மாற்றுத்திறனாளிகளின் நலனை கருத்தில்கொண்டு, வீடு தேடி குடிமைப் பொருள்கள் வழங்கும் தாயுமானவா் திட்டத்தின் கீழ் பெரம்பலூா் வட்டத்தில் 4,274 பேரும், ஆலத்தூா் வட்டத்தில் 3,866 பேரும், குன்னம் வட்டத்தில் 4,265 பேரும், வேப்பந்தட்டை வட்டத்தில் 3,413 பேரும் என மொத்தம் 15,818 போ் பயனடைந்து வருகின்றனா் என்றாா் மாவட்ட ஆட்சியா் மிருணாளினி.
ஆய்வின்போது, மாவட்ட வருவாய் அலுவலா் மு. வடிவேல்பிரபு, கூட்டுறவுச் சங்கங்களின் மண்டல இணைப்பதிவாளா் பாண்டியன், கோட்டாட்சியா் அனிதா உள்ளிட்ட பலா் உடனிருந்தனா்.
