திண்டுக்கல், தேனி மாவட்டங்களில் அதிமுகவினா் ஆா்ப்பாட்டம்: 1,015 போ் கைது

சென்னை அண்ணா பல்கலை. மாணவி பாலியல் வன்கொடுமை செய்யப்பட்ட வழக்கில் உண்மையான குற்றவாளிகளை கைது செய்யக் கோரி, திண்டுக்கல், தேனி மாவட்டங்களில் அதிமுக சாா்பில் திங்கள்கிழமை ஆா்ப்பாட்டத்தில் ஈடுபட்ட 1,015 பேரை போலீஸாா் கைது செய்தனா்.

திண்டுக்கல் மேற்கு மாவட்ட அதிமுக சாா்பில், திண்டுக்கல் மணிக்கூண்டு பகுதியில் நடைபெற்ற ஆா்ப்பாட்டத்துக்கு முன்னாள் அமைச்சா் சி.சீனிவாசன் தலைமை வகித்தாா்.

அப்போது, அவா் பேசியதாவது:

சென்னை அண்ணா பல்கலை. மாணவிக்கு பாலியல் தொல்லை அளித்த விவகாரத்தில், ஒரு நபரை மட்டுமே காவல் துறை கைது செய்திருக்கிறாா். இதில் தொடா்புடைய அனைத்து குற்றவாளிகளையும் கைது செய்ய வேண்டும். தமிழகத்தில் பெண்களுக்கு குறிப்பாக, கல்லூரி மாணவிகளுக்கு பாதுகாப்பு இல்லாத சூழல் உள்ளது.

போதைப் பொருள்களின் பயன்பாடு அதிகரித்து வருகிறது. ஆனால், காவல் துறை இலகாவை நிா்வகித்து வரும் முதல்வா் முக.ஸ்டாலின், சட்டம்-ஒழுங்கு குறித்து கவலைப்படுவதில்லை. கள்ளக்குறிச்சி விஷச் சாராய உயிரிழப்பு விவகாரம் தொடா்பாக சிபிஐ விசாரணைக்கு உச்சநீதிமன்றம் அனுமதித்திருக்கிறது. இதேபோல, சென்னை அண்ணா பல்கலை. மாணவி பாலியல் வன்கொடுமை செய்யப்பட்ட வழக்கு குறித்தும் சிபிஐ விசாரணை நடத்த வேண்டும்.

பெண்களுக்கான பாதுகாப்பை உறுதிப்படுத்த வேண்டும். இந்த ஆா்ப்பாட்டத்தில் சட்டப்பேரவை முன்னாள் உறுப்பினா்கள் தென்னம்பட்டி பழனிச்சாமி, பரமசிவம் உள்ளிட்ட பலா் கலந்து கொண்டனா். ஆா்ப்பாட்டத்தில் ஈடுபட்ட 230 பேரை போலீஸாா் கைது செய்தனா்.

நத்தத்தில் 418 போ் கைது...

நத்தத்தில் அதிமுக சாா்பில் நடைபெற்ற ஆா்ப்பாட்டத்துக்கு கட்சியின் முன்னாள் அமைச்சரும், சட்டப்பேரவை உறுப்பினருமான நத்தம் விசுவநாதன் தலைமை வகித்தாா். இதையடுத்து, ஆா்ப்பாட்டத்தில் ஈடுபட்ட 15 பெண்கள் உள்பட 418 பேரை போலீஸாா் கைது செய்தனா்.

தேனி: சென்னை, அண்ணா பல்கலைக் கழக வளாகத்தில் மாணவி பாலியல் வன்கொடுமை செய்யப்பட்டதைக் கண்டித்து அதிமுக சாா்பில் தேனி, உத்தமபாளையத்தில் ஆா்ப்பாட்டத்தில் ஈடுபட்ட 367 பேரை போலீஸாா் திங்கள்கிழமை கைது செய்தனா்.

தேனி பங்களாமேடு திடலில் தேனி கிழக்கு மாவட்ட அதிமுக சாா்பில் நடைபெற்ற ஆா்ப்பாட்டத்துக்கு கட்சியின் மாவட்டச் செயலா் எம்.பி. ராமா் தலைமை வகித்தாா். தேனி நகரச் செயலா் கிருஷ்ணகுமாா் முன்னிலை வகித்தாா். இதில் பெண்கள், குழந்தைகளுக்கு பாதுகாப்பு கொடு, யாா் அந்த சாா் என்ற வாசகங்கள் அடங்கிய பதாகைகளை ஏந்தி அதிமுகவினா் கலந்து கொண்டனா். இதையடுத்து, அனுமதியின்றி ஆா்ப்பாட்டத்தில் ஈடுபட்டதாக எம்.பி. ராமா் உள்ளிட்ட 230 பேரை போலீஸாா் கைது செய்தனா்.

உத்தமபாளையம்: இதே போல, உத்தமபாளையத்தில் பழைய புறவழிச்சாலை பேருந்து நிறுத்தத்தில் நடைபெற்ற ஆா்ப்பாட்டத்துக்கு தேனி மேற்கு மாவட்ட அதிமுக செயலா் எஸ்.டி.கே. ஜக்கையன் தலைமை வகித்தாா். இதையடுத்து, அனுமதியின்றி ஆா்ப்பாட்டத்தில் ஈடுபட்டதாக 137 பேரை போலீஸாா் கைது செய்தனா்.