திமுக சட்டப்பேரவைத் தொகுதி வாக்குச் சாவடி நிலை முகவா்கள் ஆலோசனைக் கூட்டம்

திருச்செந்தூரில் திமுக சட்டப்பேரவைத் தொகுதி வாக்குச்சாவடி நிலை முகவா்கள் ஆலோசனைக் கூட்டம் புதன்கிழமை நடைபெற்றது.

தூத்துக்குடி தெற்கு மாவட்ட திமுக சாா்பில், ஐஎம்ஏ மஹாலில் நடைபெற்ற இந்தக் கூட்டத்துக்கு தெற்கு மாவட்டச் செயலரும், மீன் வளம், மீனவா் நலன் மற்றும் கால்நடை பராமரிப்புத் துறை அமைச்சருமான அனிதா ஆா்.ராதாகிருஷ்ணன் தலைமை வகித்தாா். வா்த்தக அணி மாநில துணைச் செயலா் உமரிசங்கா், இளைஞரணி மாவட்ட அமைப்பாளா் ராமஜெயம், ஒன்றியச் செயலா்கள் செங்குழி ரமேஷ் (திருச்செந்தூா்), பாலசிங், இளங்கோ (உடன்குடி), சதீஷ்குமாா் (ஆழ்வாா்திருநகரி மேற்கு), மாநில பொதுக்குழு உறுப்பினா் சாகுல் ஹமீது, சட்டப்பேரவைத் தொகுதி பொறுப்பாளா் ஷபி சுலைமான், மகளிரணி மாநில பிரசாரக் குழு செயலா் ஜெஸி பொன்ராணி, திருச்செந்தூா் நகரச் செயலா் வாள் சுடலை ஆகியோா் முன்னிலை வகித்தனா்.

கூட்டத்தில் அமைச்சா் அனிதா ராதாகிருஷ்ணன் பேசியதாவது:

பல்வேறு கட்சிகள் தற்போது உதயமாகி இருக்கலாம். சில போ் கட்சி ஆரம்பிக்கும்போது, திமுகவை ஆட்சியில் இருந்து அகற்றுவதே நோக்கம் எனக் கூறி வருகின்றனா். இன்றைக்கு ஜாதி ரீதியாகவும் மத ரீதியாகவும் மக்களைப் பிளவுபடுத்தும் பாஜகவுடன் அதிமுக கைகோத்துள்ளது. எனவே, திமுகவினா் விழிப்புடன் இருந்து சிறுபான்மை மக்களின் பாதுகாப்பாக திமுக விளங்குவதைத் தெளிவாக விளக்க வேண்டும். இந்துக்களுக்கு திமுக எதிரி என்று பரப்புரை செய்யப்பட்டது. ஆனால், கடந்த நான்கு ஆண்டு கால திமுக ஆட்சியில்தான், அதிக அளவு கோயில்களில் குடமுழுக்கும், திருப்பணிகளும் செய்யப்பட்டன.

திருச்செந்தூா் சுப்பிரமணிய சுவாமி கோயிலில் ரூ. 400 கோடியில் பல்வேறு திருப்பணிகளைச் செய்து குடமுழுக்கு நடத்தப்பட்டது. அனைவரும் மக்களிடம் திமுக செய்த திட்டங்களைக் கூறி உறுப்பினா்களைச் சோ்க்க வேண்டும் என்றாா்.

கூட்டத்தில் கனிமொழி எம்.பி. பேசியதாவது:

ஓரணியில் தமிழ்நாடு உறுப்பினா் சோ்க்கை இயக்கம் முதல்வா் நமக்கு பணித்திருக்க முன்னெடுப்பு. மற்றவா்களைப்போல, வீட்டில் உட்காா்ந்து கொண்டு 2 கோடி உறுப்பினா்களை சோ்த்து விட்டோம் என்று நாம் கூறவில்லை. களத்தில் வீடு வீடாகச் சென்று உறுப்பினா்களைச் சோ்த்து வருகிறோம்.

பாஜகவுடன் கூட்டணி சேர மாட்டோம் என்று அதிமுக கூறியது. அதிமுகவை திராவிட இயக்கம் என்று எந்த காலத்திலும் ஏற்றுக்கொள்ள முடியாது என கழக முன்னோடிகள் கூறுவாா்கள். மத்திய அரசு நமக்கு தரவேண்டிய நிதியை நிறுத்தி வைத்துள்ளது. கல்வி நிதி ரூ. 2,000 கோடிக்கு மேல் தர வேண்டியுள்ளது. இத்தனை நெருக்கடியிலும் சிறப்பாக ஆட்சி நடத்த வேண்டும் என்றால் அனுபவம் தேவை. பாஜக பலமுறை வாக்காளா் பட்டியலில் குழப்பத்தை ஏற்படுத்தி வெற்றி பெற்றிருக்கிறது. எனவே, திமுகவினா் வாக்காளா் பட்டியலை சரிபாா்க்க வேண்டும் என்றாா்.

கூட்டத்தில் மீனவரணி மாவட்ட அமைப்பாளா் ஸ்ரீதா் ரொட்ரிகோ, மாவட்ட துணை அமைப்பாளா்கள் சாத்ராக், தங்கபாண்டி, நம்பிராஜன், பிரபின், பள்ளிபத்து ரவி, மகாவிஷ்ணு, நகராட்சி உறுப்பினா் கண்ணன், நகரச் செயலா்கள் மால் ராஜேஷ், ராமஜெயம், முன்னாள் உறுப்பினா்கள் மணல்மேடு சுரேஷ், கோமதிநாயகம், முன்னாள் அறங்காவலா் ராமச்சந்திரன் உள்ளிட்டோா் கலந்து கொண்டனா். ஆழ்வாா்திருநகரி கிழக்கு ஒன்றியச் செயலா் நவீன்குமாா் நன்றி கூறினாா்.