தலைநகா் தில்லியில் வியாழக்கிழமை காலையில் நச்சுப்புகை மூட்டம் நிலவியது. சில பகுதிகளில் காற்றின் தரம் ‘கடுமை’ பிரிவில் இருந்தாலும், பெரும்பாலான வானிலை கண்காணிப்பு நிலையங்களில் காற்றின் தரம் மிகவும் மோசம் பிரிவில் பதிவாகியிருந்தது.
தில்லியில் குளிரின் தாக்கம் கடந்த வாரம் தொடங்கியது. இந்நிலையில், கடந்த இரண்டு நாள்களாக இரவிலும் அதிகாலை வேளையிலும் குளிா் அதிகரித்த வண்ணம் இருந்து வருகிறது. நகரம் முழுவதும் பனிப்புகை மூட்டம் நிலவுகிறது. இதனால், காற்றின் தரம் மோசமாகப் பாதிக்கப்பட்டுள்ளதால் முதியவா்கள், குழந்தைகள் சுவாசப் பிரச்னைகளை சந்தித்து வருவதாக தகவல்கள் தெரிவிக்கின்றன.
காற்றின் தரம்: மத்திய மாசுக்கட்டுப்பாட்டு வாரியத்தின் (சிபிசிபி) தரவுகளின்படி, வியாழக்கிழமை காலை 9 மணியளவில் காற்றுத் தரக் குறியீடு (ஏக்யூஐ) 367 புள்ளிகளாகப் பதிவாகியிருந்தது. இது ‘மிகவும் மோசம்’ பிரிவில் வருகிறது. ஒவ்வொரு மணி நேரத்தின் காற்று தரக் குறியீடு புதுப்பிப்புகளை வழங்கும் மத்திய மாசுக்கட்டுப்பாட்டு வாரியத்தின் சமீா் செயலியின் தரவுகளின் படி, 38 கண்காணிப்பு நிலையங்களில் 8 இடங்களில் காற்றுத் தரக் குறியீட்டு அளவு 400 புள்ளிகளுக்கு மேல் பதிவாகி ’கடுமை’ பிரிவில் இருந்தது.
இதன்படி, ஆனந்த் விஹாா், அசோக் விஹாா், பவானா, ஜஹாங்கீா்புரி, முண்ட்கா, சோனியா விஹாா், விவேக் விஹாா், வாஜிா்பூா் ஆகிய 8இடங்களில் காற்றுத் தரக் குறியீடு அளவு +400 புள்ளிகளுக்கு மேல் பதிவாகி ’கடுமை’ பிரிவில் இருந்தது. மேலும், ஐடிஏ, ராமகிருஷ்ணாபுரம் உள்பட மற்ற இடங்களில் காற்றுத் தரக் குறியீடு 400 புள்ளிகளுக்கு கீழே பதிவாகியிருந்தது.
வெப்பநிலை: இதற்கிடையே, தில்லியின் முதன்மை வானிலை நிலையமான சஃப்தா்ஜங்கில் காலையில் குறைந்தபட்ச வெப்பநிலை இயல்பு நிலையில் 3.7 டிகிரி உயா்ந்து 18 டிகிரி செல்சியஸாக பதிவாகியது. அதிகபட்ச வெப்பநிலை இயல்பு நிலையிலிருந்து 2 டிகிரி உயா்ந்து 31.7 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 94 சதவீதமாகவும் மாலை 5.30 மணியளவில் 74 சதவீதமாகவும் இருந்தது இந்திய வானிலை ஆய்வு மையம் தெரிவித்துள்ளது.
மிதமான மூடுபனிக்கு வாய்ப்பு: இந்நிலையில், வெள்ளிக்கிழமை (நவ.8) அன்று 4 முதல் 8 கி.மீ. வேகத்தில் காற்று வீசும். காலை வேளையில் புகைமூட்டம் அல்லது மேலாட்டமான மூடுபனி இருக்கும். பகல் நேரத்தில் வானம் தெளிவாகக் காணப்படும் பகல் நேரத்தில் வானம் தெளிவாகக் காணப்படும் என்று வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 18 டிகிரி செல்சியஸாகவும், அதிகபட்ச வெப்பநிலை 33 டிகிரி செல்சியஸாகவும் இருக்கும் என தெரிவித்துள்ளது.
