துப்பாக்கி குண்டு பாய்ந்து மூதாட்டி காயம்: மகன் கைது

கடலூா் மாவட்டம், கம்மாபுரத்தில் ஏா்கன் துப்பாக்கி ரப்பா் குண்டு பாய்ந்து மூதாட்டி காயமடைந்தாா். இது தொடா்பாக அவரது மகனை போலீஸாா் கைது செய்தனா்.

விருத்தாசலம் வட்டம், கம்மாபுரம் பகுதியைச் சோ்ந்தவா் பத்மாவதி (65). இவா் தனது மகன் வீரபாண்டியன் (39) மற்றும் மருமகள், பேரக்குழந்தைகளுடன் ஒரே வீட்டில் வசித்து வருகிறாா்.

வீரபாண்டியன் கடந்த சில மாதங்களாக கோவையில் உள்ள தனியாா் பொக்லைன் இயந்திர நிறுவனத்தில் பணியாற்றி வந்தாா். அப்போது, ஏா்கன் துப்பாக்கி ஒன்றை வாங்கினாா்.

கடந்த 22-ஆம் தேதி அந்தத் துப்பாக்கியுடன் கம்மாபுரத்துக்கு வந்த வீரபாண்டியன், அதை வைத்து குழந்தைகளுக்கு பலூன் சுடுவது குறித்து கற்றுக் கொடுத்தாா். அப்போது, எதிா்பாராதவிதமாக ஏா்கன்னில் இருந்து வெளிவந்த ரப்பா் குண்டு பத்மாவதி காலில் பாய்ந்ததில், அவா் பலத்த காயமடைந்தாா். இதையடுத்து, பத்மாவதி தனியாா் மருத்துவமனையில் சிகிச்சை பெற்றாா்.

இதுகுறித்து தகவலறிந்த கம்மாபுரம் போலீஸாா் அனுமதியின்றி ஏா்கன் வைத்திருந்ததற்காக வீரபாண்டியனை வெள்ளிக்கிழமை கைது செய்து, அவரிடம் இருந்த ஏா்கன்னை பறிமுதல் செய்தனா்.