தேசிய அணிக்குத் திரும்பும் வீரர்! பிளே-ஆஃப் சுற்றில் ஆர்சிபிக்கு பின்னடைவாக அமையுமா?

தேசிய அணிக்குத் திரும்பும் வீரரால் ஐபிஎல் தொடரில் ஆர்சிபி அணிக்கு பின்னடைவு ஏற்படும் சூழல் ஏற்பட்டுள்ளது.

இதுவரை நடைபெற்ற 17 சீசன்களிலும் கோப்பை தாகத்தை தணிக்க முடியாத ஆர்சிபி அணி, நடப்பு ஐபிஎல் தொடரில் அதே வேட்கையுடன் சிறப்பாக விளையாடி வருகிறது. 11 போட்டிகளில் விளையாடியுள்ள பெங்களூரு அணி 8 போட்டிகளில் வெற்றி பெற்று 2-வது இடத்தில் இருக்கிறது. கிட்டத்தட்ட முதல் நான்கு இடங்களைப் பிடித்துவிடும் நிலையில் இருந்தாலும் முதலில் இரண்டு இடங்களுக்கான போட்டியில் பெங்களூரு அணி தீவிரமாக உள்ளது.

பெங்களூரு அணியில் விராட் கோலி, பில் சால்ட், படிதார், டிம் டேவிட், ரொமாரியோ ஷெப்பர்ட் ஆகியோர் பேட்டிங்கிலும், புவனேஷ்வர் குமார், ஹேசில்வுட், யஷ் தயாள் ஆகியோர் பந்துவீச்சிலும், க்ருணால் பாண்டியா பேட்டிங், பந்துவீச்சு என சிறப்பாக விளையாடி வருகின்றனர்.

இந்த நிலையில், சென்னை சூப்பர் கிங்ஸுக்கு எதிரான போட்டியில் ஐபிஎல் வரலாற்றில் 2-வது வேகமான அரைசதம் விளாசிய நட்சத்திர ஆல்-ரவுண்டர் ரொமாரியோ ஷெப்பர்ட், இங்கிலாந்து மற்றும் அயர்லாந்து சுற்றுப்பயணத்திற்கான 15 பேர் கொண்ட மேற்கிந்திய தீவுகள் ஒருநாள் அணியில் இடம் பெற்றுள்ளார். இதனால், ஒருவேளை ஆர்சிபி அணி பிளே-ஆஃப் சுற்றுக்குத் தகுதி பெற்றால் அவரால் அணியில் இடம்பெற முடியாது எனத் தெரிவிக்கப்பட்டுள்ளது.

குறிப்பாக, அயர்லாந்துக்கு எதிரான 3 ஒருநாள் போட்டிகள் கொண்ட தொடர் மே 21 ஆம் தேதி தொடங்குகிறது. அதேவேளையில் ஐபிஎல்லின் பிளே-ஆஃப் சுற்று மே 20 ஆம் தேதி தொடங்கி இறுதிப் போட்டி மே 25 ஆம் தேதி நடைபெறுகிறது. இது ஆர்சிபி அணிக்கு மிகவும் பின்னடைவாகவே பார்க்கப்படுகிறது.

இவரைத் தவிர்த்து ஆர்சிபி முன்னணி வேகப்பந்து வீச்சாளர் ஹேசில்வுட் தோள்பட்டை அசௌகரியம் காரணமாக சென்னைக்கு எதிரான போட்டியில் விளையாடவில்லை. அதேபோல சென்னைக்கு எதிரான போட்டியில் ரவீந்தர ஜடேஜா அடித்தப் பந்தை பிடிக்க முயன்றபோது கேப்டன் ரஜத் படிதார் கையில் காயமடைந்தார்.

அதிரடி தொடக்க ஆட்டக்காரர் பில் சால்ட்டும் காய்ச்சல் காரணமாக சில ஆட்டங்களில் விளையாடவில்லை. இது போன்றவை ஆர்சிபி அணிக்கு மிகவும் பின்னடைவாகவே பார்க்கப்படுகிறது. இருப்பினும், மற்ற வீரர்களின் பங்களிப்புடன் இறுதிப்போட்டிக்கு முன்னேறுமா? என்பதே ரசிகர்களில் எதிர்பார்ப்பாக இருக்கிறது.

இதையும் படிக்க: ஐபிஎல் நெறிமுறைகளை மீறிய ஹார்திக் பாண்டியா, நெஹ்ராவுக்கு அபராதம்!