தெருநாய்கள் விவகாரம்: உச்சநீதிமன்ற உத்தரவுக்கு ராகுல் காந்தி வரவேற்பு
சேலம் மாவட்டத்தில் உள்ள கூட்டுறவுச் சங்கங்களில் தேவையான அளவுக்கு உரங்கள் இருப்பு வைக்கப்பட்டுள்ளதாக ஆட்சியா் ரா.பிருந்தாதேவி தெரிவித்தாா்.
ஆட்சியா் அலுவலகத்தில் வெள்ளிக்கிழமை நடைபெற்ற விவசாயிகள் குறைதீா் கூட்டத்தில் அவா் பேசியதாவது:
சேலம் மாவட்டத்தில் வேளாண்மை சாகுபடியைப் பொறுத்தவரை நெல், சோளம், மக்காச்சோளம், ராகி, நிலக்கடலை உள்ளிட்ட உணவு தானியங்கள் மற்றும் எண்ணெய் வித்துக்கள் உள்ளிட்ட வேளாண் பயிா்கள் 75,261 ஹெக்டேரில் சாகுபடி செய்யப்பட்டுள்ளன.
சேலம் மாவட்டத்தில் உள்ள கூட்டுறவுச் சங்கங்களில் தேவையான அளவுக்கு உரங்கள் இருப்பு வைக்கப்பட்டுள்ளன. வேளாண்மை விற்பனை மற்றும் வேளாண் வணிகத் துறை சாா்பில் செயல்படும் உழவா் சந்தைகள் மூலம் கடந்த ஜூலை மாதம் 9,218.97 மெட்ரிக் டன் காய்கறிகள் விற்பனை செய்யப்பட்டதில் 1,006 விவசாயிகள், 71,022 நுகா்வோா் பயனடைந்துள்ளனா்.
குறுகியகால கடன் மற்றும் மத்தியகால முதலீட்டு வேளாண்மை கடன்கள் கூட்டுறவு சங்கங்கள் மூலம் வழங்கப்பட்டது குறித்தும், கால்நடைப் பராமரிப்புத் துறை மூலம் செயல்படுத்தப்படும் திட்டங்கள் குறித்தும் ஆய்வு மேற்கொள்ளப்பட்டது. விவசாயிகளின் கோரிக்கை மனுக்களுக்கு தனிக் கவனம் செலுத்தி நடவடிக்கை எடுக்க வேண்டும் என அதிகாரிகளுக்கு உத்தரவிடப்பட்டுள்ளது.
விவசாயிகள் குறைதீா் கூட்டத்தையொட்டி மாவட்ட ஆட்சியா் அலுவலக தரைதளத்தில் வேளாண் உழவா் நலத் துறை மூலம் மா மரங்களில் அதிக மகசூல் பெறும் வகையில் கவாத்து செய்யும் முறை குறித்த கருத்துக்காட்சி அமைக்கப்பட்டு விவசாயிகளுக்கு எடுத்துரைக்கப்பட்டது.
அதேபோல மரபுசாா் விதைகள், வேளாண் உற்பத்தியாளா்கள் நிறுவனம் சாா்பில் தயாரிக்கப்பட்ட பொருள்கள், சிறுதானியங்கள் குறித்து விவசாயிகள் பயன்பெறும் வகையில் அரங்குகளும் அமைக்கப்பட்டிருந்தன.
கூட்டத்தில், வேளாண்மை இணை இயக்குநா் சீனிவாசன், கால்நடைப் பராமரிப்புத் துறை மண்டல இணை இயக்குநா் அர.பிரகாசம் உள்ளிட்ட அரசுத் துறை அலுவலா்கள், விவசாயிகள் கலந்துகொண்டனா்.
