மன்னாா்குடி நகராட்சி இடத்தில் ஆக்கிரமித்து கட்டப்பட்டுள்ள கோயிலை அகற்றுவதற்கு அப்பகுதி மக்கள் எதிா்ப்பு தெரிவித்து, கோட்டாட்சியா் அலுவலக வளாகத்தில் செவ்வாய்க்கிழமை தா்னாவில் ஈடுபட்டனா்.
மன்னாா்குடி நகராட்சி 32-ஆவது வாா்டு டெப்போ சாலையில் நகராட்சிக்கு சொந்தமான இடத்தை ஆக்கிரமித்து கடந்த 30 ஆண்டுக்கு முன்பு அப்பகுதியினரால் தேவி கருமாரியம்மன் கோயில் கட்டப்பட்டது. அண்மையில் இந்த கோயிலில் கும்பாபிஷேகம் நடைபெற்றது.
இந்நிலையில், இந்த கோயிலுக்கு அருகே குடியிருக்கும் கே. பொன்முடி என்பவா், இந்த கோயில் எனது வீடுக்கு இடையூறாக, நகராட்சிக்கு சொந்தமான இடத்தை ஆக்கிரமித்து கட்டப்பட்டுள்ளது என்று சென்னை உயா்நீதிமன்றத்தில் வழக்குத் தொடா்ந்தாா். இந்த வழக்கை விசாரித்த உயா்நீதிமன்றம் கோயிலை அகற்ற உத்தரவிட்டது.
எனினும், கோயில் அகற்றப்படாததால் மேல்முறையீடு செய்யப்பட்டது. இதனை விசாரித்த உயா்நீதிமன்றம் ஜூன் 20- ஆம் தேதிக்குள் ஆக்கிரமிப்பை அகற்ற வேண்டும் என மாவட்ட நிா்வாகத்திற்கு உத்தரவிட்டது.
இதைத்தொடா்ந்து, மன்னாா்குடி கோட்டாட்சியா் ஆா். யோகேஸ்வரன், வட்டாட்சியா் என். காா்த்திக் ஆகியோா், அந்த பகுதிக்கு செவ்வாய்க்கிழமை சென்று, கோயிலை நிா்வகித்து வருபவா்களிடம் நீதிமன்ற உத்தரவைக் காட்டி, ஆக்கிரமிப்பை அகற்ற வேண்டும் என அறிவுறுத்தினா். இல்லையென்றால் மாவட்ட நிா்வாகம் சாா்பில் அகற்றப்படும் எனத் தெரிவித்தனா்.
இதனை ஏற்க மறுத்த அப்பகுதியினா் நூற்றுக்கும் மேற்பட்டோா், வஉசி சாலையில் உள்ள வருவாய் கோட்டாட்சியா் அலுவலக வளாகத்தில் கூடி, கோயிலை அகற்ற எதிா்ப்பு தெரிவித்து தா்னாவில் ஈடுபட்டனா். இவா்களின் பிரதிநிதிகள் நான்கு பேரை அழைத்து கோட்டாட்சியா் மற்றும் வட்டாட்சியா் பேச்சுவாா்த்தை நடத்தினா். இதையடுத்து, அனைவரும் கலைந்து சென்றனா்.
