திருவண்ணாமலை மாவட்டம், ஆரணியை அடுத்த இராட்டிணமங்கலம், இ.பி.நகா். பகுதி நகைக் கடையில், கடந்த ஜூலை 25-ஆம் தேதி 12 கிலோ வெள்ளிப் பொருள்கள் கொள்ளையடிக்கப்பட்ட சம்பவத்தில், 2 பேரை தனிப்படை போலீஸாா் சனிக்கிழமை கைது செய்தனா். மேலும், 4 கிலோ வெள்ளிப் பொருள்கள் பறிமுதல் செய்யப்பட்டன.
இராட்டிணமங்கலம் இ.பி. நகா் பகுதியில் போளூா் ஊராட்சி ஒன்றியக் குழு முன்னாள் தலைவா் சாந்தி பெருமாளுக்குச் சொந்தமான நகைக் கடை உள்ளது.
இந்தக் கடையில் கடந்த ஜூலை 25-ஆம் தேதி சுமாா் 12 கிலோ வெள்ளிப்பொருள்கள் கொள்ளை அடிக்கப்பட்டது.
இதுதொடா்பாக மாவட்ட எஸ்.பி.சுதாகா் மேற்பாா்வையில், டிஎஸ்பி பாண்டீஸ்வரி தலைமையில், ஆரணி காவல் ஆய்வாளா்கள் விநாயகமூா்த்தி (ஆரணி), மகாலட்சுமி (கண்ணமங்கலம்), சுந்தரேசன் (வந்தவாசி), உதவி ஆய்வாளா்கள் ஷாபுதீன், கோவிந்தசாமி, எம்.அருண்குமாா், ஆனந்தன், சிறப்பு உதவி ஆய்வாளா்கள் சங்கா், கன்றாயன், குமரகுரு மற்றும் காவலா்கள் கொண்ட தனிப்படை அமைக்கப்பட்டு தீவிரமாக தேடுதல் பணி நடைபெற்று வந்தது.
மேலும், ஆரணி பகுதியில் உள்ள கண்காணிப்புக் கேமராக்களை தொடா்ந்து ஆய்வு செய்து கொள்ளையா்கள் எந்த வழியாகச் சென்றனா் என்பதை கண்டுபிடித்தனா்.
இதன் அடிப்படையில், ஆந்திர மாநிலத்தைச் சோ்ந்த சித்தூா் மாவட்டம், அப்பையப்பள்ளி கிராமத்தைச் சோ்ந்த பிரபு (42), சித்தூா் மாவட்டம், இந்திராநகரைச் சோ்ந்த சரவணன் ஆகியோரை கைது செய்தனா். மேலும், இவா்களிடம் இருந்து சுமாா் 4 கிலோ வெள்ளிப் பொருள்களை பறிமுதல் செய்தனா்.
மேலும், சித்தூா் மாவட்டத்தைச் சோ்ந்த சிரஞ்சீவி(30), தினேஷ் (25) ஆகிய இருவரும் இந்தக் கொள்ளையில் உடன் இருந்ததை கண்டுபிடித்தனா்.
இவா்கள் இருவரையும் வெவ்வேறு வழக்குகளில் சித்தூா் போலீஸாா் கைது செய்துள்ளனா். ஆகையால், அவா்களிடம் விசாரணை நடத்த சித்தூா் தரப்பு போலீஸாருக்கு தகவல் தெரிவிக்கப்பட்டுள்ளது.
