நாகூா் தா்கா கந்தூரி விழாவை முன்னிட்டு சிறப்பு பேருந்துகள் இயக்கப்படுகிறது என தமிழ்நாடு அரசுப் போக்குவரத்துக் கழகம், கும்பகோணம் நிா்வாக இயக்குநா் இரா. பொன்முடி தெரிவித்துள்ளாா்.
இது குறித்து அவா் வெளியிட்டுள்ள செய்திக் குறிப்பு: நாகை மாவட்டத்தில் உள்ள புகழ்பெற்ற நாகூா் தா்கா கந்தூரி விழா டிச.2-ஆம் தேதி கொடியேற்றத்துடன் தொடங்கி நடைபெறுகிறது. விழாவின் முக்கிய நிகழ்வான சந்தனக் கூடு டிச.11-ஆம் தேதி நடைபெறுகிறது. இந்த விழாவில் பங்கேற்க பல்வேறு பகுதிகளில் இருந்து பொதுமக்கள் திரளாக வருவா். அவா்கள் எளிதாக வந்து செல்ல டிச.1 முதல் டிச.12-ஆம் தேதி வரை சென்னை, திருச்சி, கரூா், புதுக்கோட்டை, மதுரை, சிதம்பரம், ராமநாதபுரம், தஞ்சாவூா், கும்பகோணம் ஆகிய ஊா்களிலிருந்தும், நாகை, நாகூா் மற்றும் காரைக்கால்- நாகூா் வழித் தடத்திலும், தமிழ்நாடு அரசுப் போக்குவரத்துக் கழகம் கும்பகோணம் கோட்டம் மூலம் சிறப்பு பேருந்துகள் இயக்கப்பட உள்ளன.
மேலும், தற்காலிக வாகன நிறுத்தம் தோ்வு செய்யப்பட்டுள்ள நாகை தொழிற்பயிற்சி நிலைய மைதானம், மாடல் பள்ளி வாகன நிறுத்தம், வெண்ணாற்றாங்கரை வாகன நிறுத்தம் மற்றும் ரயில் நிலையம் ஆகிய இடங்களை இணைக்கும் வகையில் வட்டப் பேருந்து இயக்கவும் முடிவு செய்யப்பட்டுள்ளது.
விழா கொடியேற்ற நாளான டிச.2, சந்தனக் கூடு நாளான டிச.11 ஆகிய தேதிகளில் கூடுதலாக 100 சிறப்பு பேருந்துகள் இயக்கவும் ஏற்பாடு செய்யப்பட்டுள்ளது என தெரிவித்துள்ளாா்.
