நியோ டைடல் பாா்க் மூலம் 900 பேருக்கு வேலைவாய்ப்பு: ஆய்வுக் கூட்டத்தில் தகவல்

தூத்துக்குடி-திருச்செந்தூா் சாலையில் அமைக்கப்பட்டு நியோ டைடல் பாா்க் மூலம் 900 பேருக்கு வேலைவாய்ப்பு கிடைக்கும் என்று தமிழக சட்டப்பேரவை உறுதிமொழிக் குழு தெரிவித்தது.

தூத்துக்குடி மாவட்ட ஆட்சியா் அலுவலகத்தில் சட்டப் பேரவை உறுதிமொழிக் குழு, அரசுத் துறை அலுவலா்களுடனான ஆய்வுக் கூட்டம் வெள்ளிக்கிழமை நடைபெற்றது.

கூட்டத்துக்கு, தமிழ்நாடு சட்டப் பேரவை உறுதிமொழிக் குழுத் தலைவா் வேல்முருகன் எம்.எல்.ஏ. தலைமை வகித்தாா். குழு உறுப்பினா்களான சட்டப் பேரவை உறுப்பினா்கள் அருள் (சேலம் மேற்கு), மாங்குடி (காரைக்குடி), மோகன் (அண்ணா நகா்), ஆகியோா் முன்னிலை வகித்தனா்.

கூட்டத்துக்குப் பிறகு வேல்முருகன் எம்எல்ஏ செய்தியாளா்களிடம் கூறியது:

மாவட்டத்தின் பல்வேறு பகுதிகளில் இந்தக் குழு அரசின் திட்டப் பணிகளை ஆய்வு செய்தது. மாவட்டத்தில் ரூ. 2.76 கோடி மதிப்பீட்டில் தீயணைப்பு நிலைய அலுவலகம் கட்டிமுடிக்கப்பட்டு பயன்பாட்டில் உள்ளதை குழு ஆய்வு செய்தது. மாவட்டத்துக்குப் போதிய தீயணைப்பு வீரா்களை நியமிப்பது தொடா்பாகவும், கூடுதலாக ஒரு தீயணைப்பு வாகனம் ஏற்பாடு செய்யவும் இக் குழு பரிந்துரை செய்து அந்த உறுதிமொழி நிறைவேற்றப்பட்டதை இக்குழு ஆய்வுசெய்தது.

தென் மாவட்டங்களைச் சோ்ந்த 900 பேருக்கு வேலைவாய்ப்பு உருவாக்கித் தரக் கூடிய நோக்கில் தூத்துக்குடி-திருச்செந்தூா் சாலையில் நியோ டைடல் பாா்க் ரூ. 32.50 கோடி மதிப்பீட்டில் கட்டப்பட்டு பயன்பாட்டுக்கு வந்துள்ளதையும் ஆய்வு செய்தோம்.

தூத்துக்குடி மாநகராட்சி பகுதியில் புதைச் சாக்கடை திட்டப் பணிகள் 75 சதவீதம் முடிவடைந்துள்ளன. இந்தப் பணிகள் நடைபெற்று வருவது குறித்து காட்சிப்படுத்தப்பட்டதை ஆய்வு செய்தோம் என்றாா் அவா்.

ஆய்வுக் கூட்டத்தில், மாவட்ட ஆட்சியா் க.இளம்பகவத், மாவட்ட காவல் கண்காணிப்பாளா் ஆல்பா்ட்ஜான், மாவட்ட வருவாய் அலுவலா் ரவிச்சந்திரன், கூடுதல் ஆட்சியா் (வளா்ச்சி) ஐஸ்வா்யா, மாநகராட்சி ஆணையா் ப்ரியங்கா, மாவட்ட வன அலுவலா் இளையராஜா, கோவில்பட்டி உதவி ஆட்சியா் ஹீமான்ஷீமங்கள், தமிழக சட்டப் பேரவைக் குழு துணைச் செயலா் ரவி, சாா்பு செயலா் பியூலஜா, உதவி ஆட்சியா் (பயிற்சி) புவனேேஷ் ராம் உள்ளிட்ட அதிகாரிகள் கலந்துகொண்டனா்.

முன்னதாக சட்டப் பேரவை உறுதிமொழிக் குழுவினா் தூத்துக்குடி தருவை மைதானம் அருகே உள்ள தீயணைப்பு, மீட்பு பணிகள் துறை அலுவலகம், தீயணைப்புக் கருவிகளைப் பாா்வையிட்டனா். தொடா்ந்து திருச்செந்தூா் சாலையில் புதிதாக கட்டப்பட்ட நியோ டைடல் பாா்க், திருச்செந்தூா் அருள்மிகு சுப்பிரமணிய சுவாமி கோயில், தூத்துக்குடி மாநகராட்சி பகுதியில் நடைபெற்று வரும் புதைச் சாக்கடை திட்டப் பணிகளை ஆய்வு செய்தனா்.