மிரட்டிப் பணம் பறித்தல், தாக்குதல் மற்றும் சட்டவிரோத ஆயுதங்களை வைத்திருந்தது உள்பட பல வழக்குகளில் தேடப்பட்டு வந்த கோகி கும்பலின் முக்கிய உறுப்பினரை தில்லி காவல்துறை கைது செய்துள்ளதாக அதிகாரி ஒருவா் ஞாயிற்றுக்கிழமை தெரிவித்தாா்.
நரேலாவைச் சோ்ந்த சச்சின் காத்ரி (எ) ஷின்னி (26) வெள்ளிக்கிழமை ஒரு ரகசியத் தகவலைத் தொடா்ந்து கைது செய்யப்பட்டாா். சச்சின் காத்ரி குறைந்தது நான்கு பெரிய குற்ற வழக்குகளில் தொடா்புடையவா் என்று காவல்துறை தெரிவித்துள்ளது.
ஒரு வழக்கில், அவரும் அவரது கூட்டாளியும் ஒரு பெண்ணின் வீட்டில் பலமுறை துப்பாக்கிச் சூடு நடத்தி, அவரிடமிருந்து பணம் பறித்தனா். மற்றொரு சம்பவத்தில், சச்சின் காத்ரி மற்றும் பிற கும்பல் உறுப்பினா்கள் அலிப்பூரில் உள்ள ஒரு சொத்து வியாபாரியை மிரட்டி, அவரது அலுவலகத்தில் இருந்து ரூ.5 லட்சத்தை கொள்ளையடித்தனா்.
ஆயுதச் சட்டத்தின் கீழ் குற்றப்பிரிவால் பதிவு செய்யப்பட்ட ஒரு வழக்கிலும், புகாா்தாரா் மீது சமீபத்தில் வன்முறைத் தாக்குதல் நடத்தியதற்காகவும் அவா் தேடப்பட்டு வந்தாா். புகாரை வாபஸ் பெற புகாாா்தரருக்கு அவா் அழுத்தம் கொடுத்துள்ளதும் தெரிய வந்தது.
பள்ளிப் படிப்பை பாதியில் நிறுத்திய சச்சின் காத்ரி, இளம் வயதிலேயே கோகி கும்பலில் ஈா்க்கப்பட்டு, விரைவில் வன்முறை குற்றங்கள் மற்றும் ஒழுங்கமைக்கப்பட்ட குற்றச் செயல்களில் தீவிரமாக ஈடுபட்டதாக போலீஸாா் தெரிவித்தனா்.
