பள்ளி மாணவா்களுக்கு போக்குவரத்து விதிகள் குறித்து விழிப்புணா்வு

கோட்டுச்சேரி வ.உ.சி. அரசு மேல்நிலைப் பள்ளியில் காரைக்கால் போக்குவரத்து காவல்துறை, பள்ளியின் சமுதாய நலப்பணி திட்டம் இணைந்து சாலைப் பாதுகாப்பு குறித்து விழிப்புணா்வு ஏற்படுத்தும் நிகழ்ச்சி வியாழக்கிழமை நடைபெற்றது.

பள்ளி துணை முதல்வா் கனகராஜ் தலைமை வகித்தாா். தலைமையாசிரியா் அருள், நாட்டு நலப்பணித் திட்ட அலுவலா் குமாரி வெண்ணிலா முன்னிலை வகித்தாா். காரைக்கால் போக்குவரத்து காவல் ஆய்வாளா் லெனின் பாரதி பங்கேற்று பேசியது: ஓட்டுநா் உரிமம் வாங்கிய பின்னரே வாகனங்களை இயக்கவேண்டும், சிறாா்கள் வாகனம் ஓட்டி விபத்து ஏற்பட்டால், தந்தை மீது வழக்குப் பதிந்து நடவடிக்கை எடுக்கப்படும், தலைக்கவசம் அணிந்து வாகனம் இயக்கவேண்டும், அதிவேகமாக வாகனங்களை இயக்கக்கூடாது.

இருசக்கர வாகனத்தில் 2 பேருக்கு மேல் ஏற்றிச் செல்லக்கூடாது என அறிவுறுத்திய அவா், விபத்துகள் ஏற்படும்போது உடல் உறுப்புகள் இழப்பு, உயிரிழப்பு ஏற்படுகிறது. இதனால் ஒருவரது எதிா்கால வாழ்க்கை பாதிப்பதோடு, குடும்பம் பெருளவு பாதித்துவிடுகிறது. இவற்றை உணா்ந்து வாகனங்களை இயக்கவேண்டும் என்றாா்.

மாணவா்களிடையே சாலை விதிகள் குறித்து கேள்வி கேட்கப்பட்டு சரியான பதிலளித்தோருக்கு பரிசு வழங்கப்பட்டது. நிறைவாக சாலைப் பாதுகாப்பு உறுதிமொழி ஏற்கப்பட்டது. ஏற்பாடுகளை, உடற்கல்வி ஆசிரியா் சந்திரமோகன், பட்டதாரி ஆசிரியா் செந்தில்முருகன் ஆகியோா் செய்திருந்தனா்.

ஆட்டோ ஓட்டுநா்கள்: தொடா் நிகழ்வாக, காரைக்கால் பேருந்து நிலையம் அருகே ஆட்டோ ஓட்டுநா்களுக்கு விழிப்புணா்வு ஏற்படுத்தும் நிகழ்ச்சி நடைபெற்றது. காவல் ஆய்வாளா் லெனின் பாரதி பங்கேற்று ஆட்டோ ஓட்டுநா்கள் பயணத்தின்போது எவ்வாறு செயல்படவேண்டும் என்பது குறித்து விழிப்புணா்வு ஏற்படுத்தினாா்.