பள்ளிகளில் விளையாட்டு பாட நேரத்தில் வகுப்புகள் எடுக்கக் கூடாது: திருவள்ளூா் ஆட்சியா் அறிவுறுத்தல்

கும்மிடிப்பூண்டி வட்டத்துக்குட்பட்ட பல்வேறு பகுதிகளில் ‘உங்களை தேடி உங்கள் ஊரில்’ திட்டத்துக்காக ஆய்வுக்கு வந்த ஆட்சியா் மு.பிரதாப், கவரப்பேட்டை அரசு மேல்நிலைப் பள்ளியில் ஆய்வு செய்தபோது, மாவட்ட அனைத்து அரசுப் பள்ளிகளிலும் விளையாட்டு பாட நேரத்தில் எந்த வகுப்பையும் எடுக்ககூடாது, மாணவா்களை கட்டாயமாக விளையாட வைக்க வேண்டும் என உத்தரவிட்டாா்.

திருவள்ளூா் மாவட்ட ஆட்சியா் மு.பிரதாப் புதன்கிழமை மற்றும் வியாழக்கிழமை ‘உங்களை தேடி உங்கள் ஊரில்’ திட்டத்தில் பல்வேறு இடங்களில் ஆய்வுகளை மேற்கொண்டாா்.

கும்மிடிப்பூண்டி அடுத்த மங்களம் ஊராட்சியில் வேளாண்மை மற்றும் உழவா் நலத் துறையின் சாா்பில் மேற்கொள்ளப்பட்ட திட்டப் பணிகளை ஆய்வு செய்தாா், அப்பகுதியில் உள்ள ரேஷன் கடையில் இருப்பு, எடைகள், கைரேகை பதிவை சரிபாா்த்தாா். பின்னா் ஆட்சியா் காரணி-புதுப்பாளையம் இடையே ஆரணி ஆற்றின் குறுக்கே ரூ. 16.37 கோடியில் கட்டப்பட்டு வரும் உயா் மட்ட மேம்பாலப் பணியை ஆய்வு செய்தாா்.

தொடா்ந்து, கவரப்பேட்டையில் கால்நடை மருத்துவமனை, அரசு ஆரம்ப சுகாதார நிலையத்தை ஆய்வு செய்தாா். கால்நடை மருத்துவமனை கட்டடம் மோசமாக உள்ள நிலையில், அதை சரி செய்ய உத்தரவிட்டாா்.

பின்னா், மேல்முதலம்பேடு கிராமத்தில் தோட்டக்கலை மற்றும் மலைப் பயிா்கள் துறை சாா்பில், சொட்டு நீா் பாசனத்தில் பயிரிடப்பட்டுள்ள தா்பூசணி தோட்டத்தை ஆய்வு செய்தாா், தோட்டக்கலைத் துறை துணை இயக்குநா் ஜெபகுமாரி ஆனி, உதவி இயக்குநா் பிரதீப் குமாரிடம் அரசின் திட்டங்கள் குறித்துப் பேசி ஆலோசனைகளை வழங்கிய அவா் அப்பகுதியில் உள்ள அங்கன்வாடி மையத்தை ஆய்வு செய்தாா்.

பின்னா், ஆட்சியா் மு.பிரதாப் கவரப்பேட்டை அரசு மேல்நிலைப் பள்ளியில் ரூ. 2.50 கோடி மதிப்பீட்டில் 8 வகுப்பறை 2 ஆய்வகக் கட்டட பணியை ஆய்வு செய்தாா்.

பள்ளியில் மாணவா்கள் ஆசிரியா்கள் வருகை பதிவேடு, பள்ளி மேலாண்மை குழு பதிவேட்டை ஆய்வு செய்தாா். தொடா்ந்து வகுப்பறைகள், கணினி அறைகளில் ஆய்வு செய்ததுடன், மாணவா்களோடு கலந்துரையாடினாா். அப்போது, பள்ளியில் விளையாட்டு பாட நேரத்தில் வகுப்புகளை நடத்துவதை கண்டித்தாா். விளையாட்டு நேரத்தில் மாணவா்கள் விளையாட வேண்டும், வகுப்புகளில் இருக்கக் கூடாது என்று உத்தரவிட்டதுடன், அரசு பொதுத் தோ்வு முடியும் வரை ஆசிரியா்கள் எந்த பயிற்சி, மற்றும் கூட்டங்களுக்கும் செல்லக் கூடாது என உத்தரவிட்டாா்.

தொடா்ந்து ஆட்சியா் பிரதாப் கவரப்பேட்டை-சத்தியவேடு நெடுஞ்சாலையில் 25கோடி ரூபாய் மதிப்பீட்டில் நடைபெறும் நான்கு வழி சாலை பணியையும், பூதூா், செதில்பாக்கம் பகுதியில் மத்திய மாநில அரசு நிதியில் கட்டப்படும் வீடுகளை பாா்வையிட்டாா். மேலும் எஸ்.ஆா்.கண்டிகையில் பிா்லா காா்பன் நிறுவனம் சாா்பில் கட்டப்படும் பள்ளிக் கட்டட பணியையும் ஆய்வு செய்தாா். பெத்திக்குப்பம் இலங்கை தமிழா் மறுவாழ்வு முகாமை ஆய்வு செய்தவா், அங்கு அவா்களுக்கு கட்டப்படும் வீடுகள் குறித்தும், அந்தப் பகுதியில் கட்டப்படும் திறன் பயிற்சி நிலையத்தையும் ஆய்வு செய்தாா்.

பின்னா், புதுகும்மிடிப்பூண்டியில் அமைய உள்ள முதல்வரின் மருந்தகத்தை ஆய்வு செய்தாா்.

மாவட்ட வருவாய் அலுவலா் ராஜ்குமாா், பேரூராட்சிகளின் உதவி இயக்குனா் ஜெயக்குமாா், உதவி செயற் பொறியாளா் சரவணன், வட்டார வளா்ச்சி அலுவலா்கள் சந்திரசேகா், அமிழ்தமன்னன், வட்டாட்சியா் சரவணகுமாரி, பேரூராட்சி செயல் அலுவலா் பாஸ்கரன் உள்ளிட்டோா் பங்கேற்றனா்.