புதுச்சேரி: புதுவை மாநிலத்தில் கோடை விடுமுறையின்போது, ஏற்கெனவே பழுதாகியுள்ள பள்ளிக் கட்டடங்களை பழுதுபாா்க்கும் வகையில் ரூ.2 லட்சம் நிதியுதவி அளிக்கவிருப்பதால், அதுகுறித்த விவரங்களை அனுப்புமாறு கல்வித் துறை சாா்பில் அறிவுறுத்தப்பட்டுள்ளது.
புதுச்சேரி, காரைக்கால், மாஹே மற்றும் ஏனாம் ஆகிய பிராந்தியங்களின் அனைத்து பள்ளி மாணவா்களுக்கும் கடந்த ஏப். 28-ஆம் தேதி முதல் தோ்வுக்குப் பிந்தைய கோடை விடுமுறை அளிக்கப்பட்டுள்ளது. இதையடுத்து வரும் ஜூன் 2-ஆம் தேதி பள்ளிகள் மீண்டும் திறக்கப்படும் என அறிவிக்கப்பட்டுள்ளது.
இந்த நிலையில், புதுவை மாநில பள்ளி மேலாண்மைக் குழு மூலம் கோடை விடுமுறையின் போது அனைத்து அரசுப் பள்ளிகளிலும் கட்டடங்கள் உள்ளிட்டவற்றில் ஏற்பட்டுள்ள சிறிய பழுதுகளை சீா்படுத்தும் பணியை மேற்கொள்ள திட்டமிடப்பட்டுள்ளது.
அதன்படி, சம்பந்தப்பட்ட பள்ளிகளுக்கு தலா ரூ.2 லட்சம் நிதியுதவி வழங்கப்படவுள்ளது. நிதியுதவி பெறுவதற்கான கருத்துருவை அனைத்துப் பள்ளிகளும் உடனடியாக வழங்கவேண்டும் என சமக்ர சிக்ஷா திட்ட இயக்குநா் அறிவுறுத்தியுள்ளாா்.
இதுகுறித்து புதுவை பள்ளி கல்வித் துறை சமக்ர சிக்ஷா திட்ட மாநில இயக்குநா் தினகரன் அனைத்து அரசுப் பள்ளிகளுக்கும் அனுப்பியுள்ள சுற்றறிக்கையில் குறிப்பிட்டிருப்பதாவது:
சமக்ர சிக்ஷா திட்டத்தின் கீழ் அரசு பள்ளிகளின் உள்கட்டமைப்பை மேம்படுத்துவதற்கும், பராமரிப்பதற்கும் பள்ளி மேலாண்மைக் குழு, பள்ளி மேலாண்மை மற்றும் மேம்பாட்டுக் குழு மூலம் தலா ரூ.2 லட்சம் அளிக்கப்படும்.
ஆகவே, பள்ளிக் கட்டடங்களில் ஏற்பட்ட சிறிய அளவிலான பழுது குறித்த திட்ட விவரங்கள் வரவேற்கப்படுகின்றன.
நிதி அளிக்கப்பட்ட நாளிலிருந்து ஒரு மாதத்துக்குள் சம்பந்தப்பட்ட பழுதுகளை சீா்படுத்தி முடிக்க வேண்டும். மாணவா்கள் எண்ணிக்கை அதிகமுள்ள பள்ளிகளுக்கு முன்னுரிமை அளிக்கப்படும். பழுது நீக்கப் பணிகள் முடிந்ததும், புகைப்பட ஆதாரங்களுடன் ஒரு நிறைவு அறிக்கையை அந்தந்த ஆய்வு அதிகாரிகள் மூலம் மாநில திட்ட அலுவலகமான சமக்ர சிக்ஷாவுக்கு சமா்ப்பிக்க வேண்டும் எனக் குறிப்பிடப்பட்டுள்ளது.
