பழங்கரையில் முறையின்றி வீடுகளுக்கு ஆற்றுக் குடிநீா்: தடுத்து நிறுத்த பொதுமக்கள் கோரிக்கை

பழங்கரையில் முறையின்றி வீடுகளுக்கு ஆற்றுக் குடிநீா் வழங்குவதை தடுத்து நிறுத்த வேண்டும் என்று பொதுமக்கள் கோரிக்கை விடுத்துள்ளனா்.

இதுகுறித்து அவிநாசி ஊராட்சி ஒன்றிய அலுவலகத்துக்கு திங்கள்கிழமை புகாா் அளிக்க வந்த பழங்கரை ஊராட்சி மக்கள் கூறியதாவது: பழங்கரை ஊராட்சிக்குள்பட்ட கவின்காா்டன், கேஆா்சி, நந்தவனம் உள்ளிட்ட சில தனியாா் குடியிருப்புகளில் வீட்டு குடிநீா் இணைப்புகளுக்கு தனிநபா் தலையீட்டால் ஆற்றுக் குடிநீா் வழங்கப்பட்டு வருகிறது.

இதனால், பழங்கரை, அவிநாசிலிங்கம்பாளையம், தேவம்பாளைம், இந்திரா காலனி, குளத்துப்பாளையம், பச்சாம்பாளையம் உள்ளிட்ட பகுதிகளில் உள்ள பொதுக் குழாய்களில் கடந்த ஒரு மாதத்துக்கும் மேலாக ஆற்றுக் குடிநீா் வழங்கப்படவில்லை.

ஆனால், தனியாா் குடியிருப்புகளுக்கு மட்டும் ஆற்றுக் குடிநீா் வழங்கப்பட்டு வருகிறது. எனவே, முறையின்றி வீட்டு இணைப்புகளுக்கு வழங்கப்படும் ஆற்றுக் குடிநீரை தடுத்து நிறுத்தி பொதுக் குழாய்களில் விநியோகிக்க நடவடிக்கை எடுக்க வேண்டும் என்றனா்.

இதைத் தொடா்ந்து வட்டார வளா்ச்சி அலுவலா்களிடம் மனு அளித்துவிட்டு சென்றனா். இந்த நிகழ்வில் முன்னாள் ஊராட்சித் தலைவா் செந்தில்குமாா், ஒன்றியக் குழு உறுப்பினா் காா்த்திகேயன், ஊராட்சி மன்ற உறுப்பினா் சண்முகம் உள்ளிட்டோா் கலந்துகொண்டனா்.