பழைய ஓய்வூதியத் திட்டத்தை நிறைவேற்ற வேண்டும்: மார்க்சிஸ்ட் மாநில மாநாட்டில் தீர்மானம்

விழுப்புரம்: விழுப்புரத்தில் மாா்க்சிஸ்ட் கம்யூனிஸ்ட் கட்சியின் 24-ஆவது மாநில மாநாடு கடந்த வெள்ளிக்கிழமை தொடங்கியது. மாநாட்டுக்கு கட்சியின் மத்தியக் குழு உறுப்பினா் பெ.சண்முகம் தலைமை வகித்தாா்.

மாா்க்சிஸ்ட் அரசியல் தலைமைக் குழு ஒருங்கிணைப்பாளா் பிரகாஷ் காரத், அரசியல் தலைமைக் குழு உறுப்பினா்கள் பிருந்தா காரத், ஜி.ராமகிருஷ்ணன், மாநிலச் செயலா் கே.பாலகிருஷ்ணன், மாநிலக் குழு உறுப்பினா் டி.கே.ரங்கராஜன், மக்களவை உறுப்பினா்கள் சு.வெங்கடேசன், சச்சிதானந்தம், சட்டப்பேரவை உறுப்பினா்கள் நாகை மாலி, சின்னத்துரை, மாநிலச் செயற்குழு உறுப்பினா்கள் கே.பாலபாரதி, டி.ரவீந்திரன், மாவட்டச் செயலா் சுப்பிரமணியன் உள்ளிட்டோா் பங்கேற்றனா்.

மாநில மாநாட்டின் நிறைவு நாளான ஞாயிற்றுக்கிழமை (ஜன.5) பிரதிநிதிகள் மாநாடு நடைபெற்றது. புதிய மாநிலக் குழு, மாநிலக் கட்டுப்பாட்டுக் குழு தோ்வும், அகில இந்திய மாநாட்டுப் பிரதிநிதிகள் தோ்வும் நடைபெற்றன.கட்சியின் வளா்ச்சிக்காக மேற்கொள்ளப்பட வேண்டியவை, எதிா்காலத் திட்டங்கள், மக்கள் சந்திப்பு இயக்கங்களை நடத்த திட்டமிடுதல் போன்றவை குறித்து பிரதிநிதிகள் மாநாட்டில் விவாதிக்கப்பட்டன.

மேலும், மார்க்சிஸ்ட் கம்யூனிஸ்ட் கட்சியின் மாநிலக்குழு செயலாளராக பெ. சண்முகம் தேர்ந்தெடுக்கப்பட்டுள்ளார்.

இதனிடையே, இந்த மாநாட்டில் முக்கியத் தீா்மானங்கள் பல நிறைவேற்றப்பட்டுள்ளன. அவற்றுள் ஒன்றாக, அனைத்து அரசு ஊழியர்கள், ஆசிரியர்களுக்கு பழைய ஓய்வூதியத் திட்டத்தை நிறைவேற்ற வேண்டும் என்ற தீர்மானம் நிறைவேற்றப்பட்டுள்ளது.

இத்தீர்மானத்தில், “அரசு ஊழியர்கள், அசிரியர்கள் ஏப்ரல் 1, 2003 அன்று அல்லது அதற்குப் பின் அரசுப் பணியில் சேர்ந்திருந்தால், அவர்களுக்கு பழைய ஓய்வூதியத் திட்டப்படி பணப் பலன் கிடைக்காது. ஏனெனில், மேற்கண்ட ஊழியர்கள் சிபிஎஸ் ஓய்வூதியத் திடத்தின்கீழ் கொண்டு வரப்பட்டுள்ளனர்.

இந்தியாவில் 5 மாநிலங்களில் பழைய ஓய்வூதியத் திட்டம் செயல்பாட்டுக்கு வரத் தொடங்கிவிட்டது. இந்த நிலையில், புதிய ஓய்வூதியத் திட்டம் முடக்கபடும் என்று திமுக வாக்குறுதி அளித்திருந்தபோதிலும், அதனை இதுவரை நிறைவேற்றவில்லை” எனக் குறிப்பிட்டுள்ளதுடன், தமிழக அரசு தேர்தல் வாக்குறுதி அளித்திருந்தபடி, பழைய ஓய்வூதியத் திட்டத்தை திரும்ப அமல்படுத்த வேண்டும் என வலியுறுத்தப்பட்டுள்ளது.