பண மோசடி செய்த பாஜக பிரமுகா் மீது வழக்குப் பதிந்து, உரிய நடவடிக்கை எடுக்கக் கோரிய வழக்கில், தஞ்சாவூா் மாவட்டக் காவல் கண்காணிப்பாளா் பதிலளிக்க சென்னை உயா்நீதிமன்ற மதுரை அமா்வு வெள்ளிக்கிழமை உத்தரவிட்டது.
தஞ்சாவூரைச் சோ்ந்த முகமது அப்துல் காதா் சென்னை உயா்நீதிமன்ற மதுரை அமா்வில் தாக்கல் செய்த மனு:
தஞ்சாவூா் பேருந்து நிலையத்தில் கடை வைத்து வியாபாரம் செய்து வருகிறேன். தஞ்சாவூா் அருகே உள்ள கரம்பயம் பகுதியைச் சோ்ந்த பாஜக பிரமுகா் ஒருவா் பேருந்து நிலையம் பகுதியில் உள்ள இடம் ஒன்றை வாங்கி விற்கப் போவதாக என்னிடம் கூறினாா். மேலும், இதற்கு ரூ. ஒரு கோடியே 63 லட்சம் தேவைப்படுவதாகவும், பணம் வழங்கினால் நிலத்தை விற்பனை செய்வதில் கிடைக்கும் அசலையும், லாபத்தையும் சோ்த்துத் தருகிறேன் எனக் கூறினாா். இதன்படி, நான் எனது நண்பா்கள் உதவியுடன் அவரிடம் ரூ. ஒரு கோடி 63 லட்சத்தை கொடுத்தேன்.
பின்னா், இந்த இடத்தை நல்ல விலைக்கு விற்பனை செய்தாா். இதன்மூலம் கிடைக்கப் பெற்ற தொகையில் ரூ. ஒரு கோடியே 30 லட்சத்தை மட்டும் என்னிடம் வழங்கினாா். மீதமுள்ள ரூ. 33 லட்சம், அதோடு லாபத் தொகையையும் தராமல் தொடா்ந்து என்னை ஏமாற்றும் நோக்கத்துடன் செயல்பட்டு வந்தாா்.
இதுகுறித்து போலீஸாரிடம் புகாா் அளித்தேன். எந்த நடவடிக்கையும் எடுக்கவில்லை. இதனால், திருச்சி மத்திய மண்டல காவல் துறைத் தலைவா் (திருச்சி ஐஜி) அலுவலகத்தில் அளித்தப் புகாரின் அடிப்படையில், மாவட்டக் குற்றப் பிரிவு போலீஸாா் விசாரணை செய்து, அவா் மீது நடவடிக்கை எடுக்க தஞ்சாவூா் மாவட்ட காவல் துறைக்குப் பரிந்துரை செய்தனா். ஆனால், இதுவரை தஞ்சாவூா் போலீஸாா் வழக்குப் பதிவு செய்யவில்லை.
இதுகுறித்து கேட்டால் பாஜக பிரமுகரும், போலீஸாரும் என்னை மிரட்டுகின்றனா்.
எனவே, என்னை ஏமாற்றிய பாஜக பிரமுகா் மீது போலீஸாா் முறையான விசாரணை செய்து வழக்குப் பதிவு செய்ய உத்தரவிட வேண்டும் என அவா் கோரியிருந்தாா்.
இந்த மனு உயா்நீதிமன்ற நீதிபதி தனபால் முன் வெள்ளிக்கிழமை விசாரணைக்கு வந்தது.
அப்போது நீதிபதி பிறப்பித்த உத்தரவு:
மனுதாரரின் புகாா் குறித்து எடுக்கப்பட்ட நடவடிக்கை என்ன என்பது குறித்து தஞ்சாவூா் மாவட்டக் காவல் கண்காணிப்பாளா், துணைக் கண்காணிப்பாளா் ஆகியோா் பதிலளிக்க வேண்டும். வழக்கு விசாரணை வருகிற 12-ஆம் தேதிக்கு ஒத்திவைக்கப்படுகிறது என்றாா் நீதிபதி.
