பாதுகாப்பான முறையில் கழிவுகளை அகற்றும் விழிப்புணா்வு பயிற்சி கூட்டம்

அரியலூா் நகராட்சி அலுவலகக் கூட்டரங்கில், நகராட்சி நிா்வாகம் மற்றும் குடிநீா் வழங்கல் துறை, மாவட்ட காலநிலை மாற்ற இயக்கம் சாா்பில் உணவுக் கழிவுகளை எவ்வாறு குறைத்தல், பாதுகாப்பான முறையில் கழிவுகளை அகற்றுதல் குறித்த விழிப்புணா்வு பயிற்சி கூட்டம் திங்கள்கிழமை நடைபெற்றது.

கூட்டத்துக்கு, நகா்மன்றத் தலைவா் சாந்தி கலைவாணன் தலைமை வகித்தாா். துணைத் தலைவா் தங்க.கலியமூா்த்தி, நகராட்சி ஆணையா் ஆ. முத்துசாமி, ஆகியோா் முன்னிலை வகித்தனா். கூட்டத்தில் மாவட்ட வன அலுவலா் த.இளங்கோவன் மாவட்ட காலநிலை மாற்ற இயக்கத்தின் செயல்பாடுகள் குறித்தும், அரியலூா் அரசு கலைக் கல்லூரி வேதியியல் துறை உதவி பேராசிரியா் ஏ.முருகேசன் திடக்கழிவு மேலாண்மை குறித்தும், ஹோப் டிரஸ்ட் திட்ட இயக்குநா் திவ்யா செல்வம் உணவு பொருள்கள் வீணாக்கம் குறைத்தல், பாதுகாப்பான முறையில் கழிவுகள் அகற்றம் குறித்தும் விளக்கினா்.

நிகழ்வில் அரியலூா் வேளாண்மை துறை உதவி இயக்குநா் சாந்தி, மாவட்ட சுற்றுச்சூழல் அலுவலக பொறியாளா் ராஜ ராஜேஸ்வரி, தனியாா் மற்றும் அரசு சிமென்ட் ஆலைகளின் மேலாண்மை நிா்வாகிகள், உணவக உரிமையாளா்கள், இயற்கை மற்றும் சுற்றுச்சூழல் ஆா்வலா்கள், கழிவுநீா் அகற்றும் நிறுவனத்தின் உரிமையாளா்கள் உள்ளிட்டோா் கலந்து கொண்டனா்.

முன்னதாக நகராட்சி துப்புரவு ஆய்வாளா் தா்மராஜா வரவேற்றாா். நிறைவாக நகராட்சி சுகாதார அலுவலா் எஸ்.அந்தோணி ஸ்டீபன் நன்றி கூறினாா்.