பாரம்பரிய நெல் ரகங்களை அரசே கொள்முதல் செய்ய வேண்டும்: குறைதீா் கூட்டத்தில் விவசாயிகள் கோரிக்கை

திருவண்ணாமலை மாவட்டத்தில் விவசாயிகள் உற்பத்தி செய்யும் பாரம்பரிய நெல் ரகங்களை அரசே கொள்முதல் செய்ய வேண்டும் என்று குறைதீா் கூட்டத்தில் விவசாயிகள் கோரிக்கை விடுத்தனா்.

திருவண்ணாமலை மாவட்ட அளவிலான விவசாயிகள் குறைதீா் கூட்டம் வெள்ளிக்கிழமை நடைபெற்றது. மாவட்ட ஆட்சியா் அலுவலகத்தில் நடைபெற்ற கூட்டத்துக்கு, ஆட்சியா் க.தா்ப்பகராஜ் தலைமை வகித்தாா். மாவட்ட வருவாய் அலுவலா் இரா.இராம்பிரதீபன், திருவண்ணாமலை வருவாய்க் கோட்டாட்சியா் ராஜ்குமாா், வேளாண் இணை இயக்குநா் கண்ணகி ஆகியோா் முன்னிலை வகித்தனா்.

கூட்டத்தில், விவசாயிகள், விவசாய சங்கப் பிரதிநிதிகள் பேசியதாவது: திருவண்ணாமலை மாவட்டத்தில் தகுதியான விவசாயிகளுக்கு பி.எம். கிஸான் நிதியுதவி பெற்றுத்தர மாவட்ட நிா்வாகம் விரைந்து நடவடிக்கை எடுக்க வேண்டும். ஃபென்ஞால் புயலின்போது, பெய்த பலத்த மழையால் பாதிக்கப்பட்ட பயிா்களுக்கு விரைவில் நிவாரணம் வழங்க வேண்டும். விவசாயிகள் உற்பத்தி செய்யும் பாரம்பரிய நெல் ரகங்களை அரசே கொள்முதல் செய்ய வேண்டும்.

திருவண்ணாமலை மாவட்டத்தில் புதிய நறுமணத் தொழற்சாலையை அமைக்க வேண்டும். மூடப்பட்ட அருணாச்சலா சா்க்கரை ஆலை மற்றும் போளூா் தரணி சா்க்கரை ஆலை நிா்வாகங்கள் விவசாயிகளுக்கு வழங்க வேண்டிய கரும்பு நிலுவைத் தொகைத் தொகையை பெற்றுத்தர மாவட்ட நிா்வாகம் நடவடிக்கை எடுக்க வேண்டும். திருவண்ணாமலை மாவட்டத்தில் வன விலங்குகளால் ஏற்படும் பாதிப்புகளை முறையாக ஆய்வு செய்து உரிய இழப்பீடு வழங்க வேண்டும் என்றனா்.

இதையடுத்துப் பேசிய மாவட்ட ஆட்சியா், திருவண்ணாமலை மாவட்டத்தில் மழையால் பாதிக்கப்பட்ட பயிா்களுக்கு ரூ.77 கோடியே 33 லட்சத்து 10 ஆயிரத்து 578 மதிப்பிலான நிவாரணத் தொகை 1,09,752 விவசாயிகளுக்கு வழங்க ஆணையிடப்பட்டு உள்ளது. விரைவில் நிவாரணத் தொகை வழங்கப்படும். விவசாயிகளின் மற்ற கோரிக்கைகள் மீது விரைந்து நடவடிக்கை எடுக்கப்படும் என்றாா்.

கூட்டத்தில், மாவட்ட ஆட்சியரின் நோ்முக உதவியாளா் (வேளாண்) தி.மலா்விழி, கூட்டுறவுச் சங்கங்களின் மண்டல இணைப் பதிவாளா் பாா்த்திபன் மற்றும் அரசுத்துறை அலுவலா்கள் கலந்துகொண்டனா்.