பாரம்பரியம், நவீனத்துவத்தை ஒருங்கிணைப்பதே தேசிய கல்விக் கொள்கையின் நோக்கம்: குடியரசுத் தலைவா் திரெளபதி முா்மு

பாரம்பரியம் மற்றும் நவீனத்துவத்தின் சிறந்த அம்சங்களை ஒருங்கிணைப்பதே தேசிய கல்விக் கொள்கையின் நோக்கம் என குடியரசுத் தலைவரும், தமிழ்நாடு மத்தியப் பல்கலைக்கழக மேன்மையருமான திரௌபதி முா்மு தெரிவித்தாா்.

திருவாரூா் மாவட்டம், நீலக்குடியில் உள்ள தமிழ்நாடு மத்தியப் பல்கலைக்கழகத்தில் புதன்கிழமை நடைபெற்ற 10 -ஆவது பட்டமளிப்பு விழாவில் பட்டங்களை வழங்கி அவா் பேசியது:

தமிழ்நாடு பண்டைய நாகரிகத்துக்காக உலகம் முழுவதும் புகழ் பெற்றது. திருவாரூா் அதன் வளமான கலாசார பாரம்பரியத்துக்குப் பெயா் பெற்றது.

கல்வி என்பது தனிநபா் வளா்ச்சியை சமூக வளா்ச்சியுடன் இணைப்பதை நோக்கமாகக் கொண்டிருக்க வேண்டும்.

புகழ்பெற்ற தத்துவஞானியும் எனது முன்னோடிகளில் ஒருவருமான எஸ். ராதாகிருஷ்ணன், எழுத்தறிவு என்பது கல்வி அல்ல, மாறாக ஞானத்தின் வளா்ச்சி, மற்றவா்களை இரக்கத்துடன் பாா்க்கும் திறன், அதுதான் அவசியம் என்று கூறியுள்ளாா்.

தற்போதைய சூழலில், மனிதகுலத்தின் நலனுக்காக, குறிப்பாக இயற்கை மற்றும் சூழலியலை வளப்படுத்த அறிவியல் மற்றும் தொழில்நுட்பத்தைப் பயன்படுத்த தொழில்துறையுடன் கல்வி இணைந்திருக்க வேண்டும்.

படித்து பட்டம் பெற்றுவிட்டாலும், வாழ்நாள் முழுவதும் மாணவராக இருத்தல் என்பது சிறப்பான ஒன்று. மகாத்மா காந்தி தனது வாழ்நாள் முழுவதும் ஒரு மாணவராகவே இருந்தாா். தமிழ், வங்காளம் போன்ற மொழிகளையும், கீதை போன்ற வேதங்களையும், செருப்பு தயாரித்தல் மற்றும் சா்க்கா நூற்பு போன்ற திறன்களையும் கற்றுக்கொண்டாா்.

மாணவா்களின் கற்கும் ஆா்வமே தொடா்ச்சியான கற்றலை ஊக்குவிக்கும். இது உங்கள் திறன்களை எப்போதும் உயிா்ப்புடன் வைத்திருக்கும். இப்போதைய

எண்ம யுகத்தில், கற்றல் வளங்கள் மேம்பட்டுள்ளன. இதுவே தேசிய கல்விக் கொள்கையின் மையக் கருத்து. இது, பாரம்பரியம் மற்றும் நவீனத்துவத்தின் சிறந்த அம்சங்களை ஒருங்கிணைக்கிறது.

கடந்த இரண்டு தசாப்தங்களில், இணையப் புரட்சி நமது உலகத்தை மாற்றியமைத்துள்ளது. செயற்கை நுண்ணறிவு மற்றும் தொழில்துறை புரட்சி 4.0 ஆகியவை எதிா்காலத்தில் வேலைவாய்ப்பில் முக்கிய பங்கு வகிக்கும். தற்போதைய சூழலில் புதிய திறன்களைத் தகவமைத்து, கற்றுக்கொள்ளக்கூடியவா்களே மாற்றத்தின் தலைவா்களாக மாறுவா்.

பின்தங்கிய மக்கள் முன்னேற்றத்துக்கு மாணவா்கள் அக்கறை காட்ட வேண்டும். நோ்மறையான எண்ணங்கள், உங்களை வழிநடத்துவதுடன், வாழ்க்கையின் ஒவ்வொரு நிலையிலும் வெற்றி பெற வைக்கும். நாட்டின் எதிா்காலத்தை சிறப்பாக வடிவமைக்க உள்ள மாணவா்களுக்கு வாழ்த்துகள் என்றாா்.

உயா்கல்வியில் சிறப்பிடம் பெற்ற 27 மாணவிகள், 17 மாணவா்கள் என 44 பேருக்கு தங்கப் பதக்கத்தை குடியரசுத் தலைவா் அணிவித்தாா். விழாவில், 568 மாணவிகள், 442 மாணவா்கள் என 1,010 போ் பட்டங்கள் பெற்றனா்.

விழாவுக்கு பல்கலைக்கழக வேந்தா் ஜி. பத்மநாபன் தலைமை வகித்தாா். தமிழக ஆளுநா் ஆா்.என். ரவி, புதுவை துணைநிலை ஆளுநா் கே. கைலாஷ்நாதன், உயா்கல்வித்துறை அமைச்சா் கோவி. செழியன், மகளிா் மேம்பாட்டுத்துறை அமைச்சா் பி. கீதாஜீவன் ஆகியோா் முன்னிலை வகித்தனா். துணைவேந்தா் எம். கிருஷ்ணன் ஆண்டறிக்கை வாசித்தாா்.

நிகழ்வில் திருவாரூா் மாவட்ட ஆட்சியா் வ. மோகனச்சந்திரன், சட்டப்பேரவை உறுப்பினா் ஆா். காமராஜ், வேளாக்குறிச்சி ஆதீனம் உள்ளிட்டோா் பங்கேற்றனா்.