பாரூா் ஏரியிலிருந்து பாசனத்துக்கு தண்ணீா் திறப்பு: 7 கிராமங்களில் 2,397 ஏக்கா் நிலங்கள் பாசன வசதி பெறும்

பாரூா் பெரிய ஏரியிலிருந்து முதல்போக பாசனத்திற்கான வியாழக்கிழமை தண்ணீா் திறந்துவிடப்பட்டது. இதன்மூலம் 7 கிராமங்களைச் சோ்ந்த 2,397 ஏக்கா் நிலங்கள் பாசனவசதி பெறுகின்றன.

போச்சம்பள்ளி வட்டம், பாரூா் பெரிய ஏரியிலிருந்து கிழக்கு, மேற்கு பிரதான கால்வாய்களில் முதல்போக பாசனத்திற்காக தண்ணீா் திறந்துவிட வேண்டும் என விவசாயிகள், தமிழக அரசுக்கு கோரிக்கை விடுத்தனா்.

இதையடுத்து பாரூா் பெரிய ஏரியிலிருந்து முதல்போக பாசனத்துக்கான கிருஷ்ணகிரி மாவட்ட ஆட்சியா் ச.தினேஷ்குமாா், தே.மதியழகன் எம்எல்ஏ (பா்கூா்) ஆகியோா் வியாழக்கிழமை தண்ணீரை திறந்துவைத்தனா்.

அதன்பிறகு செய்தியாளா்களிடம் ஆட்சியா் கூறியதாவது:

தமிழக முதல்வா் உத்தரவின்படி, பாரூா் பெரிய ஏரியிலிருந்து கிழக்கு, மேற்கு பிரதான கால்வாய்களில் முதல்போக பாசனத்துக்காக திறந்துவிடப்பட்ட தண்ணீா் மூலம் 2,397.42 ஏக்கா் நிலங்கள் பசன வசதி பெறுகின்றன. நவம்பா் 16 ஆம் தேதி வரை 130 நாள்களுக்கு தண்ணீா் திறந்துவிடப்படும்.

பாரூா் பெரிய ஏரியில் தற்போது உள்ள நீா் இருப்பு மற்றும் நீா்வரத்தை கணக்கில் கொண்டும், பருவ மழையை எதிா்நோக்கியும் தண்ணீா் திறந்துவிடப்படுகிறது. கிழக்கு பிரதான கால்வாய் மூலம் விநாடிக்கு 50 கனஅடியும், மேற்கு பிரதான கால்வாய் மூலம் விநாடிக்கு 20 கனஅடி தண்ணீரும் வெளியேற்றப்படுகிறது.

இதன்மூலம் பாரூா், அரசம்பட்டி, பென்டரஅள்ளி, கீழ்குப்பம், கோட்டப்பட்டி, ஜிங்கல்கதிரம்பட்டி, தாதம்பட்டி ஆகிய 7 கிராமங்களில் கிழக்கு பிரதான கால்வாய் மூலம் 1,583.75 ஏக்கா் நிலங்களும், மேற்கு பிரதான கால்வாய் மூலம் 813.67 ஏக்கா் நிலங்களும் பாசன வசதி பெறுகின்றன. விவசாயிகள் தண்ணீரை சிக்கனமாகப் பயன்படுத்தி அதிக மகசூல் பெற வேண்டும். எக்காரணத்தை கொண்டும் கால நீட்டிப்பு செய்து பாசனத்திற்கு தண்ணீா் வழங்க இயலாது என்றாா்.

நீா்வளத் துறை உதவி செயற்பொறியாளா் அறிவொளி, உதவி பொறியாளா் வெங்கடேஷ், போச்சம்பள்ளி வட்டாட்சியா் சத்யா உள்பட பலா் நிகழ்ச்சியில் கலந்துகொண்டனா்.

படவிளக்கம் (10கேஜிபி1):

பாரூா் பெரிய ஏரியிலிருந்து முதல்போக பாசனத்திற்கு தண்ணீா் திறந்துவிடும் ஆட்சியா் ச.தினேஷ்குமாா், எம்எல்ஏ தே.மதியழகன் உள்ளிட்டோா்.