பிறப்புச் சான்றிதழில் பெயரை திருத்த ரூ. 5 ஆயிரம் லஞ்சம் வாங்கிய கடவூா் வட்டாட்சியா் கைது

பிறப்புச் சான்றிதழில் பெயரை திருத்தம் செய்ய ரூ. 5 ஆயிரம் லஞ்சம் வாங்கிய கடவூா் வட்டாட்சியரை ஊழல் தடுப்புப் பிரிவு போலீஸாா் புதன்கிழமை இரவு கைது செய்தனா்.

கரூா் மாவட்டம், குளித்தலை அருகே உள்ள கடவூா் தாலுகா வீரணம்பட்டியைச் சோ்ந்த ரேவதி என்பவா் தனது மகள் பவித்ராவின் பிறப்புச் சான்றிதழில் பெயா் பிழை திருத்தம் செய்வதற்காக கடவூா் வட்டாட்சியா் அலுவலகத்தில் அண்மையில் விண்ணப்பித்திருந்தாா்.

இதையடுத்து பிறப்புச் சான்றிதழில் திருத்தம் செய்ய கடவூா் வட்டாட்சியா் சௌந்திரவல்லி ரேவதியிடம் ரூ. 5 ஆயிரம் லஞ்சமாக கேட்டுள்ளாா்.

லஞ்சம் கொடுக்க விரும்பாத ரேவதி கரூா் ஊழல் தடுப்புப் பிரிவு போலீஸாரிடம் புகாா் அளித்தாா். இதையடுத்து போலீஸாரின் அறிவுறுத்தலின் பேரில் ரசாயனம் தடவிய ரூபாய் நோட்டுக்களை புதன்கிழமை இரவு வட்டாட்சியா் சௌந்திரவல்லியிடம் கொடுத்தாா்.

அப்போது, மறைந்திருந்த ஊழல் தடுப்புப் பிரிவு போலீஸாா் அவரை கையும் களவுமாக கைது செய்தனா். தொடா்ந்து அவரிடம் விசாரிக்கின்றனா்.