புதுவையில் குற்றங்கள் குறைந்துள்ளன: முதல்வா் என்.ரங்கசாமி

புதிய குற்றவியல் சட்டம் அமல்படுத்தப்பட்டதையடுத்து, புதுவையில் குற்றங்கள் குறைந்துள்ளதாக முதல்வா் என்.ரங்கசாமி தெரிவித்தாா்.

3 புதிய குற்றவியல் சட்டங்கள் அமல்படுத்தப்பட்டதன் ஓராண்டு நிறைவு விழா புதுச்சேரியில் காவல் துறை சாா்பில் செவ்வாய்க்கிழமை நடைபெற்றது.

விழாவில் முதல்வா் என்.ரங்கசாமி பேசியதாவது: புதுவை அமைதிப் பூங்காவாக திகழ்ந்து வருவததற்காக காவல் துறையினரைப் பாராட்டுகிறேன். புதுவை காவல் துறையில் காலியிடங்கள் நிரப்பப்பட்டு வருகின்றன. புதிய குற்றவியல் சட்டம் அமல்படுத்தப்பட்ட பிறகு, புதுவையில் குற்றம் குறைந்துள்ளது.

தொழில்நுட்ப வளா்ச்சிக்கு ஏற்ப நீதி அமைப்பில் சீா்திருத்தம் தேவை என்பதை உணா்ந்து மத்திய அரசு இந்தச் சட்டங்களை நவீனப்படுத்தியுள்ளது. இதனால், குற்றவியல் வழக்குகளில் விரைவான தீா்வு கிடைக்கிறது என்றாா் முதல்வா் ரங்கசாமி.

சட்டப்பேரவைத் தலைவா் ஆா்.செல்வம், மாநில உள்துறை அமைச்சா் ஆ.நமச்சிவாயம், சட்டத் துறை அமைச்சா் க.லட்சுமி நாராயணன் ஆகியோா் பேசினா்.

தலைமைச் செயலா் சரத் சௌகான், உள்துறை செயலா் கேசவன், டிஜிபி ஷாலினி சிங், டிஐஜி சத்திய சுந்தரம், முதுநிலை எஸ்.பி. கலைவாணன், அனிபால் கென்னடி எம்எல்ஏ உள்ளிட்டோா் கலந்து கொண்டனா்.

3 புதிய குற்றவியல் சட்டங்களை அமல்படுத்தியது தொடா்பான காணொலி விழாவில் இடம் பெற்றது. மேலும், இந்தச் சட்டங்கள் நடைமுறைப்படுத்தப்பட்டு ஓராண்டு நிறைவடைந்ததை குறிக்கும் வகையிலான கையேட்டையும் முதல்வா் என்.ரங்கசாமி வெளியிட்டாா்.