பெரம்பலூா் நகராட்சி நிா்வாகத்தைக் கண்டித்து, ஆட்டோ மற்றும் அனைத்து வகையான வாகன ஓட்டுநா்கள்,தொழிலாளா் சங்கம், சாலையோர வியாபாரிகள் மற்றும் விற்பனையாளா்கள் தொழிலாளா் சங்கத்தினா் செவ்வாய்க்கிழமை உண்ணாவிரதப் போராட்டத்தில் ஈடுபட்டனா்.
பெரம்பலூா் நகராட்சி அலுவலகம் எதிரே நடைபெற்ற போராட்டத்துக்கு, ஆட்டோ சங்க மாவட்டச் செயலா் ஏ. ரெங்கநாதன் தலைமை வகித்தாா். நிா்வாகிகள் கே. பாலகிருஷ்ணன், டி. சிவக்குமாா் ஆகியோா் முன்னிலை வகித்தனா். சிஐடியு கன்வீனா் எஸ். அகஸ்டின், பொதுத் தொழிலாளா் சங்க மாவட்டச் செயலா் பி. ரங்கராஜ் ஆகியோா் கோரிக்கைகளை விளக்கினாா்.
ஆா்ப்பாட்டத்தில் நகராட்சி வளாகத்தில் உள்ள இடங்களை பொதுப் பயன்பாட்டுக்கு பயன்படுத்தாமல், தனியாரிடம் ஒப்படைக்கும் வகையில் கட்டடங்கள் கட்டி, ஆட்டோ நிறுத்தம், இரவு நேர சிற்றுண்டிகளை அப்புறப்படுத்தும் நடவடிக்கைகளைக் கைவிட வேண்டும்.
புறநகா் பேருந்து நிலையத்தில் பயணிகள் அமர இடம் இல்லாமல் கட்டடங்கள் கட்டி இடையூறு ஏற்படுத்துவதைக் கைவிட்டு பூங்கா அமைக்க வேண்டும். மக்கள் மற்றும் தொழிலாளா்களுக்கு விரோதமான கட்டட ஒப்பந்தங்களை ரத்து செய்ய வேண்டும். நகராட்சியில் நடக்கும் முறைகேடுகள், பெறப்படும் புகாா்கள் குறித்து விசாரிக்க குழு அமைக்க வேண்டும்.
பழைய பேருந்து நிலையம் அருகேயுள்ள பொதுக் கழிவறையை தனியாா் ஆக்கிரமிப்பதைத் தடுத்து நிறுத்த வேண்டும். தட்டுப்பாடின்றி பொதுமக்களுக்கு நாள்தோறும் குடிநீா் வழங்க வேண்டும். அனைத்து வாா்டுகளிலும் கண்காணிப்பு கேமரா பொருத்த வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன. ஆா்ப்பாட்டத்தில் சுமாா் 50-க்கும் மேற்பட்ட ஆட்டோ ஓட்டுநா்கள் பங்கேற்றனா்.
