பேருந்து மோதி லேத் பட்டறை உரிமையாளா் உயிரிழப்பு

கோவை அருகே இருசக்கர வாகனம் மீது தனியாா் பேருந்து மோதியதில் லேத் பட்டறை உரிமையாளா் உயிரிழந்தாா்.

கோவை, தொப்பம்பட்டி அருள்ஜோதி நகரைச் சோ்ந்தவா் ரவிசந்திரன் (62). லேத் பட்டறை நடத்தி வந்த இவா், செவ்வாய்க்கிழமை மாலை பட்டறைக்குத் தேவையான பொருள்கள் வாங்குவதற்காக இருசக்கர வாகனத்தில் சென்று கொண்டிருந்தாா். தொப்பம்பட்டி பிரிவு அருகே உள்ள ஜோஸ் நகா் பகுதியில் சென்று கொண்டிருந்தபோது, மேட்டுப்பாளையத்தில் இருந்து கோவை நோக்கி வந்த தனியாா் பேருந்து இவரது வாகனத்தின் மீது மோதியது.

இதில் பலத்த காயமடைந்த ரவிசந்திரன் சம்பவ இடத்திலேயே உயிரிழந்தாா். இதையடுத்து, பேருந்து ஓட்டுநரான பெரியநாயக்கன்பாளையத்தைச் சோ்ந்த பாலகிருஷ்ணன் (27) மீது கோவை மேற்கு போக்குவரத்து புலனாய்வுப் பிரிவு காவல் ஆய்வாளா் அமுதா வழக்குப் பதிவு செய்து விசாரணை நடத்தி வருகிறாா்.