திருவாரூா்: பொது விநியோகத் திட்டத்துக்கு தனித்துறை ஏற்படுத்தக் கோரி, திருவாரூரில் மாவட்ட கூட்டுறவு ஊழியா் சங்கம் (சிஐடியு) சாா்பில் ஆா்ப்பாட்டம் திங்கள்கிழமை நடைபெற்றது.
நியாயவிலைக் கடைகளில் எடைத் தராசுடன் ப்ளுடூத் இணைக்கும் பணியை ரத்து செய்ய வேண்டும். தமிழ்நாடு நுகா்பொருள் வாணிபக் கழகத்திடமிருந்து நியாயவிலைக் கடைகளுக்கு வரும் பொருள்களை சரியான எடையிட்டு அனுப்ப வேண்டும். பொது விநியோகத் திட்டத்துக்கு தனித்துறை உருவாக்க வேண்டும். எல்லா நியாயவிலைக் கடைகளுக்கும் குடும்ப அட்டைகள் எண்ணிக்கை வேறுபாடின்றி எடையாளரை நியமிக்க வேண்டும்.
சமவேலைக்கு சமஊதியம் என்ற முறையில் தமிழ்நாடு நுகா்பொருள் வாணிபக் கழகத்துக்கு ஈடாக கூட்டுறவுத் துறை விற்பனையாளா்களுக்கும் ஊதியம் அளிக்க வேண்டும். மருத்துவக் காப்பீடு திட்டத்தை பெயரளவில் செயல்படுத்தாமல், அனைத்து விதமான நோய்களுக்கும் நீட்டிப்பு செய்ய வேண்டும் என்பன உள்ளிட்ட பல்வேறு கோரிக்கைகளை வலியுறுத்தி மண்டல இணைப் பதிவாளா் அலுவலகம் முன் இந்த ஆா்ப்பாட்டம் நடைபெற்றது.
சங்கத்தின் மாவட்ட பொருளாளா் எஸ். செல்வம் தலைமை வகித்தாா். தமிழ்நாடு கூட்டுறவு ஊழியா் சம்மேளனத்தின் பொதுச் செயலாளா் என்.ஆா்.ஆா். ஜீவானந்தம் கோரிக்கைகளை விளக்கிப் பேசினாா். இதில், சிஐடியு மாவட்டத் தலைவா் எம்கேஎன். அனிபா, மாவட்டச் செயலாளா் இரா. மாலதி, கூட்டுறவு ஊழியா் சங்க மாவட்டச் செயலாளா் எம். செல்வராஜ் உள்ளிட்ட பலா் பங்கேற்று, கோரிக்கைகளை நிறைவேற்ற வலியுறுத்தி முழக்கங்களை எழுப்பினா்.
