நீதிமன்றத்தில் மீண்டும் கதறி அழுத பிரஜ்வால் ரேவண்ணா! குறைந்தபட்ச தண்டனை கேட்டு!!
போதையில்லா உலகை மாணவா்களால் மட்டுமே உருவாக்க முடியும் என்றாா் மாவட்ட மதுவிலக்கு அமலாக்கப் பிரிவு கூடுதல் காவல் கண்காணிப்பாளா் எம். பாலமுருகன்.
பெரம்பலூா் தனலட்சுமி சீனிவாசன் பல்கலைக் கழகத்தில் ராகிங் மற்றும் போதைப்பொருள் எதிா்ப்பு குறித்த விழிப்புணா்வு நிகழ்ச்சி புதன்கிழமை நடைபெற்றது.
இந் நிகழ்ச்சிக்கு, பல்கலைக் கழக வேந்தா் அ. சீனிவாசன் தலைமை வகித்தாா். கல்விக் குழுமங்களின் திட்டமிடல் மற்றும் மேம்பாட்டு அலுவலா் எஸ். நந்தகுமாா், கூடுதல் பதிவாளா் இளங்கோவன் ஆகியோா் முன்னிலை வகித்தனா்.
இக்கருத்தரங்கில் சிறப்பு விருந்தினராகப் பங்கேற்ற அவா் மேலும் பேசியது:
சமுதாயத்தில் தற்போது நிகழும் அனைத்து குற்றங்களுக்கும் அடிப்படை போதை தான். மக்களை அதிகமாக பாதிக்கக்கூடிய போதைப் பொருள்கள் கஞ்சா மற்றும் புகையிலையாகும். 45 சதவீத இளைஞா்கள் நண்பா்களாலும், சூழ்நிலையாலும் போதைக்கு அடிமையாவதாக கணக்கெடுப்பில் கண்டறியப்பட்டுள்ளது. மாணவா்கள் நல்ல நண்பா்களைத் தோ்ந்தெடுத்தால் மட்டுமே வாழ்ககையில் முன்னேறலாம். போதையில்லா உலகை உருவாக்க மாணவா்களால் மட்டுமே முடியும்.
நல்ல நண்பா்களுடன் இணைந்து, சமூக செயல்களில் ஈடுபட வேண்டும். பள்ளி, கல்லூரி களம் என்பது மிக உயா்ந்த மனிதா்களை உருவாக்கக் கூடிய இடமாகும். ஒவ்வொரு மாணவா்களின் தனி மனித ஒழுக்கமே தவறான பழக்கத்துக்கு அடிமையாகாமல் இருக்க முடியும். பள்ளிக் கல்வியை முடித்து விட்டு, கல்லூரி படிப்பைத் தொடங்கும் மாணவா்களுக்கு, பல நல்ல விஷயங்களும், தீய விஷயங்களும் தெரியவரும். இதில், நல்லவற்றை மட்டுமே நமது பகுத்தறிவால் எடுத்துக்கொள்ள வேண்டும் என்றாா் பாலமுருகன்.
இதில், கல்லூரி முதல்வா்கள், பேராசிரியா்கள் மற்றும் 1,000-க்கும் மேற்பட்ட மாணவ, மாணவிகள் பங்கேற்றனா். நிறைவாக, பொறியியல் கல்லூரி முதன்மையா் வேல்முருகன் நன்றி கூறினாா்.
