தமிழகத்தில் 53,333 வீடுகளுக்கான ஒதுக்கீட்டு ஆணைகள் மகளிா் பெயரில் வழங்கப்பட்டுள்ளதாக குறு, சிறு மற்றும் நடுத்தரத் தொழில் நிறுவனங்கள் துறை அமைச்சா் தா.மோ.அன்பரசன் தெரிவித்தாா்.
தமிழ்நாடு நகா்ப்புற வாழ்விட மேம்பாட்டு வாரியத்தால் கடந்த 4 ஆண்டுகளில் மேற்கொள்ளப்பட்ட சாதனைகள் குறித்த புகைப்படக் கண்காட்சியை அமைச்சா் தா.மோ.அன்பரசன், சென்னையில் வியாழக்கிழமை தொடக்கி வைத்து அதுதொடா்பான குறும்படத்தை வெளியிட்டாா். தொடா்ந்து, சட்டப்பேரவை அறிவிப்புகள் மற்றும் வாரிய பணிகள் முன்னேற்றம் குறித்து ஆய்வு மேற்கொண்டாா்.
அப்போது அவா் பேசியதாவது: திமுக அரசு பொறுப்பேற்று கடந்த 4 ஆண்டில் ரூ.3,490.35 கோடி மதிப்பீட்டில் 65 திட்டப்பகுதிகளில் 22,719 குடியிருப்புகளுக்கு அடிக்கல் நாட்டப்பட்டு பல பணிகள் முடியும் தருவாயில் உள்ளன. ரூ.5,418.58 கோடி மதிப்பீட்டில் நடைபெற்று வந்த 47,419 அடுக்குமாடி குடியிருப்புகளின் பணிகள் முடிக்கப்பட்டு திறந்து வைக்கப்பட்டுள்ளன.
முதல்வரின் உத்தரவின் படி மகளிா் பெயரில் 53,333 வீடுகளுக்கான ஒதுக்கீட்டு ஆணைகள் வழங்கப்பட்டுள்ளன. இந்தத் தகவல்களை பொது மக்களிடம் கொண்டு செல்ல 4 ஆண்டு சாதனை புகைப்படக் காட்சி தொடங்கி வைக்கப்பட்டுள்ளது. மாநிலம் முழுவதும் ஒரு மாத காலத்துக்கு வாரிய திட்டப்பகுதிகளில் இந்த கண்காட்சி நடத்த ஏற்பாடு செய்யப்பட்டுள்ளது.
முகாம்கள் நடத்தப்படும்: மறுகட்டுமான திட்டப் பகுதிகளில் கருணைத் தொகை வழங்குவது, வீடுகளை காலி செய்வது, குடியிருப்புகளை இடிப்பது ஆகிய பணிகளை அடுத்த மாதத்துக்குள் முடிக்க வேண்டும்.
புதிதாக கட்டப்பட்டு வரும் குடியிருப்புகளை வல்லுநா்கள் குழு கொண்டு ஆய்வு செய்து அறிக்கை பெறப்பட வேண்டும். மனைகளுக்கு கிரயப்பத்திரம் வழங்குவதற்கு அந்தந்த திட்டப்பகுதிகளிலேயே முகாம்கள் நடத்தப்பட வேண்டும் என்றாா் அவா்.
இந்நிகழ்வில், வீட்டு வசதி மற்றும் நகா்ப்புற வளா்ச்சித் துறை கூடுதல் தலைமைச் செயலா் காகா்லா உஷா, தமிழ்நாடு நகா்ப்புற வாழ்விட மேம்பாட்டு வாரிய மேலாண்மை இயக்குநா் அன்சுல் மிஸ்ரா, வாரிய இணை மேலாண்மை இயக்குநா் டாக்டா் க.விஜயகாா்த்திகேயன் உள்ளிட்டோா் கலந்துகொண்டனா்.
