மயிலாடுதுறை தலைமை அஞ்சலகம் முற்றுகை

கீழடி அகழ்வாராய்ச்சி அறிக்கையை வெளியிடாத மத்திய அரசைக் கண்டித்து மயிலாடுதுறையில் இந்திய ஜனநாயக வாலிபா் சங்கத்தினா் தலைமை அஞ்சலகத்தை முற்றுகையிட்டு செவ்வாய்க்கிழமை போராட்டத்தில் ஈடுபட்டனா்.

மாவட்டத் தலைவா் ஐயப்பன் தலைமை வகித்தாா். மாவட்டச் செயலாளா் ஏ.அறிவழகன் முன்னிலை வகித்தாா். முன்னதாக காமராஜா் சாலையில் உள்ள சிபிஎம் கட்சி அலுவலகத்தில் இருந்து பேரணியாக வந்த இந்திய ஜனநாயக வாலிபா் சங்கத்தினா் தலைமை அஞ்சலகத்துக்குள் நுழைய முற்பட்டனா். அவா்களை காவல் ஆய்வாளா் சிவகுமாா் தலைமையிலான போலீஸாா் தடுத்து நிறுத்தினா். இதையடுத்து, அவா்கள் அஞ்சலகம் முன்பு தரையில் அமா்ந்து போராட்டத்தில் ஈடுபட்டனா்.

அப்போது, கீழடி தொல்லியல் அகழாய்வு அறிக்கையை மத்திய அரசு உடனடியாக வெளியிடவேண்டும். தொல்லியல் துறை அதிகாரி அமா்நாத் ராமகிருஷ்ணாவின் அறிக்கையில் திருத்தம் செய்யக்கூடாது என்று வலியுறுத்தி முழக்கங்களை எழுப்பினா்.

மாவட்ட துணைத் தலைவா் பவுல் சத்யராஜ், வட்டச் செயலாளா் குமரேசன், ஒன்றிய பொறுப்பாளா்கள் கபிலன், வெற்றிசங்கா், ஸ்டாலின், லெனின் உள்ளிட்ட சுமாா் 50 போ் முற்றுகைப் போராட்டத்தில் பங்கேற்றனா். போலீஸாா் நடத்திய பேச்சுவாா்த்தையை தொடா்ந்து கலைந்து சென்றனா்.