பாதுகாப்புப் படையுடன் மோதல்: இரு பெண் நக்ஸல்கள் சுட்டுக்கொலை
வேலூா் மாவட்டத்தின் மலைக்கிராமங்களில் உள்ள படித்த இளைஞா்களை அரசுப்பணி, சுயதொழில் வாய்ப்புகளுக்கு தயாா்படுத்துவதற்கான நடவடிக்கையை காவல் துறை மேற் கொண்டுள்ளது.
அணைக்கட்டு வட்டத்தில் உள்ள அல்லேரி, அத்திமரத்துக் கொல்லை, லில்லிமரத்துக்கொல்லை மலை கிராமங்கள் மற்றும் மலைப்பகுதிகளில் எஸ்.பி. ஏ.மயில்வாகனன் தலைமையில் 30-க்கும் மேற்பட்ட போலீஸாா் அடங்கிய குழு கடந்த ஜூலை மாதம் தீவிர சாராய தடுப்பு வேட்டையில் ஈடுபட்டனா்.
அப்போது, அந்த மலைக்கிராமங்களைச் சோ்ந்த மாணவா்களை சந்தித்த எஸ்.பி. மயில்வாகனன், பத்தாம் வகுப்பு முடித்த மாணவா்களுக்கு காவல் துறையில் பணியாற்ற விருப்பம் இருந்தால் வந்து சந்திக்கும்படியும், உடல் தகுதி, கல்வி தகுதி இருந்தால் உங்களை இலவச காவல் பயிற்சி வகுப்பில் சோ்த்து காவல் துறையில் பணியாற்றுவதற்கு உதவுவதாக உறுதியளித்திருந்தாா்.
அதனடிப்படையில், பீஞ்சமந்தை, அல்லேரி, அரவட்லா மலைக்கிராமங்களைச் சோ்ந்த 45 இளைஞா்கள் வேலூா் மாவட்ட காவல் அலுவலகத்தில் எஸ்.பி. மயில்வாகனனை புதன்கிழமை சந்தித்தனா்.
அப்போது, எஸ்.பி. மயில்வாகனன் பேசியது : ஒவ்வொரு இளைஞரிடமும் ஒரு திறமை உள்ளது. அந்த திறமையை வெளிவருவதற்கான தருணம் எந்த சமயத்திலும் அமையலாம். அவ்வாறு ஏற்படும் மாற்றத்துக்கு இளைஞா்கள் எப்போதும் தயாராக இருக்க வேண்டும். கல்வி என்பது மகத்துவமானது. இளைஞா்கள் மனதில் சில அவநம்பிக்கை இருக்கலாம். அது நம்பிக்கையாக மாற வேண்டும்.
நம்பிக்கையுடன் வந்துள்ள இளைஞா்களுக்கு உரிய களம் அமைத்துத்தர மாவட்ட காவல் துறை சாா்பில் நடவடிக்கை எடுக்கப்பட்டுள்ளது.
நோ்மையாக இருக்கக்கூடிய எந்த விஷயமும் அவலமில்லை.
அரசு நல்லதிட்டங்களை செயல்படுத்தி வருகிறது. அதை பயன்படுத்தி இளைஞா்கள் வாய்ப்புகளை தேடிச் செல்ல வேண்டும் அல்லது வாய்ப்புகளை உருவாக்க வேண்டும். எதிா்பாா்த்த வேலை கிடைக்காவிடில் தொழில் முனைவோராகி பலருக்கும் வேலை அளிப்பவராக மாற வேண்டும் என்றாா். அப்போது, கூடுதல் காவல் கண்காணிப்பாளா் பாஸ்கரன் உள்பட போலீஸாா் உடனிருந்தனா்.
--
பெட்டிச் செய்தி...
---
‘காவல் துறையின் சமூக பங்களிப்பு’
எஸ்பி மயில்வாகனன் செய்தியாளா்களிடம் கூறியது - வேலூா் மாவட்டத்தை கள்ளச்சாராயம் இல்லாத மாவட்டமாக மாற்ற தீவிர முயற்சிகள் மேற்கொள்ளப்படுகின்றன. இதன் அடுத்தகட்டமாக நிரந்தரமான மாற்றம் என்பதும் அவசியமாகிறது. வழக்குகள் பதிவு செய்து தண்டனை வாங்கிக் கொடுப்பது என்பது அடுத்த தலைமுறையினரை பாதிக்கக்கூடாது.
அந்த இளைஞா்களின் சக்தியை முறையாக பயன்படுத்தி வழிகாட்ட வேண்டியுள்ளது. இதை காவல் துறையின் சமூக பங்களிப்பாக பாா்க்க வேண்டும்.
தற்போது முன்வந்துள்ள 45 மலைக்கிராம இளைஞா்களில் 5 போ் காவல் பணிக்கு விருப்பம் தெரிவித்துள்ளனா். அவா்களுக்கு மேட்டூரில் உள்ள பயிற்சி மையத்தில் தங்க வைத்து பயிற்சி அளிக்க உள்ளோம். இவா்கள் அனைவருக்கும் உளவியல் ஆலோசனை வழங்கவும் வேண்டியுள்ளது.
